Unya nahitabo nga walo ka adlaw human niining mga pulonga, gidala ni Hesus si Pedro, Juan, ug Santiago, ug mitungas ngadto sa bukid aron mag-ampo. Ug nahitabo nga samtang nag-ampo siya, ang pamayhon sa iyang panagway nausab ug ang iyang sapot naggilakgilak sa kaputi. Ug tan-awa, duha ka lalaki nakigkulukabildo kaniya; sila mao si Moises ug Elias nga human magpakita nga mahimayaon naghisgot mahitungod sa iyang kamatayon nga iyang pagatumanon didto sa Jerusalem.
“Apan si Pedro ug iyang mga kauban gidaog sa katulogon. Ug sa ilang pagmata, nakita nila ang iyang himaya ug ang duha ka lalaki nga nagtindog uban kaniya. Ug nahitabo nga sa dihang mobiya na sila gikan kaniya, miingon si Pedro kang Hesus, ‘Agalon, maayo nga ania kita dinhi. Ug magtukod kita og tulo ka mga payag, usa alang kanimo, usa lang kang Moises, ug usa alang kang Elias’ – bisan og wala gayud siya makasabot sa iyang gipanulti.
“Apan samtang nagsulti pa siya niining mga butanga, dihay mitungha nga panganod ug mitabon kanila.
Ug nangahadlok sila sa dihang misulod sila sa panganod. Ug dihay tingog nga gikan sa panganod nga nagaingon, ‘Kini mao ang pinili kong Anak, patalinghugi ninyo siya’. Unya human nadungog ang tingog, hipalgan si Hesus nga nag-inusara. Ug sila naghilomhilom ug wala gayud moasoy kang bisan kinsa niadtong mga adlawa kabahin sa ilang nakita” (Lk.9:28-36).
Si Ginoong Hesus mao ang piniling Anak sa Dios, sumala sa ebanghelyo karong adlawa. Ug ang Diyos Amahan tataw nga nagkanayon, “Patalinghugi ninyo siya.”
Ngano man kaha nga nagamando man ang Diyos Amahan nga patalinghugan gayud ang pinili niyang Anak?
Agig tubag nini, si San Juan nagkanayon: “Kay gihigugma gayud sa Diyos ang kalibutan sa ingon nga gihatag niya ang iyang bugtong Anak aron ang tanan nga nagatuo kaniya dili mamatay kondili makabaton og kinabuhing dayon” (Jn.3:16).
Busa atong makita nga usa lamang ang gipadala sa Diyos Amahan nganhi sa kalibutan aron pagluwas niini, ug kana mao ang iyang bugtong Anak nga si Ginoong Hesus.
Ug ang Anak, nga mao si Ginoong Hesus, miingon, “Ako ug ang Amahan usa ra kami” (Jn10:30).
Ug si Ginoong Hesus miingon usab, “Ako mao ang dalan, ang kamatuoran, ug ang kinabuhi; walay moadto sa Amahan gawas pinaagi kanako” (Jn.14:6).
Kon sumadahon, si Ginoong Hesus mao ang Anak sa Amahan. Gipadala siya dinhi sa kalibutan aron pagluwas niini. Ug siya lamang ang dalan paingon ngadto sa Amahan. Siya lamang ang kamatuoran ug ang kinabuhi, nga sa ato pa, ang kaluwasan gikan sa perdisyon nga mao ang impiyerno.
Walay lain nga makaluwas sa kalag sa tawo gawas lamang ni Ginoong Hesukristo.