Ning Ebanghelyo karong Dominggoha, nagsaysay si San Lukas sa pagpakaon ni Ginoong Hesus sa lima ka libo (twa.Lk.9:10-17).
Nahitabo kini didto sa Lungsod sa Betsaida. Adunay daghang mga tawo (may lima ka libo ka mga lalaki) nga ming-apas kang Ginoong Hesus ug sa mga tinun-an.
Sa pagsalop na sa adlaw, miingon ang mga tinun-an kang Ginoong Hesus nga palakton ang mga tawo ngadto sa kasikbit nga mga balangay aron pagpangita og ilang makaon. Apan si Ginoong Hesus mitubag kanila nga sila mismo ang mopakaon kanila.
Ang mga tinun-an nagkanayon nga lima ra ka buok pan ug duha ra ka buok isda ang anaa.
Apan si Ginoong Hesus miingon kanila nga palingkoron ang mga tawo sa hugpong nga tinag-50. Ug gituman sa mga tinun-an ang sugo ni Ginoong Hesus.
Mikuha si Ginoong Hesus sa lima kabuok pan ug duha ka buok isda, miyahat sa langit, ug nagpasalamat sa Diyos.
Mipikaspikas ug mihatag siya niini ngadto sa mga tinun-an aron iapod-apod ngadto sa mga tawo. Nangabusog ang tanan, ug aduna pay nahipos nga 12 ka bukag ang mga tinun-an.
Ning Ebanghelyo karong adlawa, atong makita ang panag-abot sa duha ka lantag sa panghunahuna: 1.) ang panghunahuna sa mga tinun-an nga imposible mapakaon ang lima ka libo sa lima lamang ka pan ug duha lamang ka isda; 2.) ang panghunahuna ni Ginoong Hesus nga nagpakita nga walay imposible sa Diyos.
Nabalaka ang mga tinun-an, basin og mangapasmo ang mga tawo kung walay ikapanihapon.
Apan niadtong tungora, gipakita ni Ginoong Hesus ang iyang pagka-Diyos. kay, pinaagi usab niini, motubo pa ang pagtuo sa mga tawo kaniya ug sa mensahe sa kaluwasan.
Kon nahaw-as sila sa lawasnon nga gutom, mahaw-as usab sila sa espirituhanon nga kagutom; buot ipasabot, ang kaluwasan sa kalag.
Niadtong higayona, ang panghunahuna sa mga tinun-an nagsubay pa gayud sa balaod sa kinaiyahan. Para nila, imposible ang lima ka pan ug duha ka isda nga makaapod sa lima ka libo. Dili pa lawom ug hingpit ang pagtugkad sa mga tinun-an kung unsa ug kinsa gayud si Ginoong Hesus.
II - Adunay nanag-ingon nga dili kadto milagro, kondili aduna na kunoy dala daang bawon ang mga tawo, ug iyahay na lang silag hikyad sa ilang tagsatagsa ka mga pagkaon. Apan adunay pipila ka mga pangutana niining panglantawa.
Una, wala ba diay masayod nang daan si Ginoong Hesus niini nga aduna diay dalang bawon ang mga tawo, aron di na lang siya mopikaspikas niadtong lima ka pan ug duha ka isda?
Ikaduha, wala ba gayuy usa sa 12 ka tinun-an nga nakaalinggat nga adunay dalang bawon ang tagsatagsa kanila, aron di na lang sila moingon ni Ginoong Hesus nga palakton ang mga tawo?
Ikatulo, nakapangandam na ba diayng daan ang mga tawo sa ilang tagsatagsa ka bawon dihang kalit silang nasayod hain si Ginoong Hesus?
Ikaupat, nganong gihipos man sa mga tinun-an ang subrang 12 ka bukag, kon ilaha man kadto sa mga tawo? Di ba diay hipuson ang salin sa ilang bawon ug ilang dad-on pauli sa ilaha?
Kining mga pangutanaha moalkontra sa panan-aw nga dili milagro ang gibuhat ni Ginoong Hesus niadtong tungora. Usa kadto ka milagro, sama nga ang Ostiyas ug Bino mahimo gayong LAWAS ug DUGO ni Ginoong Hesus atol sa konsagrayson diha sa Santos nga Misa!
III - Busa, usa ka pagtulun-an nga atong mapupo niini mao nga ibutang gayud nato ang pagtuo ug pagsalig nga ang Diyos makahimo sa bisan unsa kung buot gayud siya nga mohimo niini tungod ug alang sa kaluwasan sa katawhan.