Ang Ebanghelyo karong adlawa kinutlo gikan sa Ebanghelyo ni San Juan (21:1-14). Naghulagway kini sa pagpakita ni Ginoong Hesus sa iyang mga tinun-an didto sa Lanaw sa Tiberias.
Si Simon Pedro, ubang sa laing mga tinun-an, nanagat nianang gabhiona. Pagkabuntag wala gayod silay kuha. Sa may baybayon nagtindog si Ginoong Hesus, apan wala dayon sila makaila kaniya.
“Busa miingon kanila si Hesus, ‘Mga anak, aduna ba kamoy kuha?’ Mitubag sila kaniya, ‘Wala’. Ug siya miingon kanila, ‘Itaktak ang inyong baling sa tuo sa sakayan, ug makakaplag kamo’. Busa gitaktak nila, ug wala na silay kusog pagbira niini tungod sa kadaghanon sa mga isda … usa ka gatos ug kalim-an ug tulo ka buok (153) (b.5-6,11).
Dinhi, usa ka kamatuoran ang migimaw. Ang mga apostoles walay kuha nga isda sa ilang kaugalingon lamang; apan nakakuha sila og daghan human gituman nila ang sugo ni Ginoong Hesus. Kabahin kini sa butang materyal. Apan mahimo usab kining iisa ngadto sa butang espirituhanon.
Si Ginoong Hesus mismo nagaingon: “Ako ang punoan sa paras; kamo ang mga sanga. Ang magapabilin dinhi kanako ug ako diha kaniya, kini siya mamunga og daghan, tungod kay gawas kanako wala kamoy bisan unsa nga mahimo” (Jn.15:5).
Gisulti kini ni Ginoong Hesus ngadto sa mga Apostoles. Ug matuod kini kaniadto hangtod karon ug sa umaabot. Ug matuod usab kini dinhi kanatong mga yanong sumusunod ni Ginoong Hesu-Kristo, nga kon wala siya wala kitay mahimo.
Apan ato kining iaplay sa dakong mahitabo karon sa Simbahang Katoliko: ang umaabot nga Conclave, diin pagapilion ang laing Santo Papa.
Ang mga Kardinal mao karon ang mga Aspotoles nga gisangonan sa pagpili og Santo Papa, laing PEDRO. Nahitabo ang susamang pagpili sa panahon nila ni Simon Pedro, sa dihang nagpili sila og hulip kang Hudas Eskasyote.
“Ug gipabarog nila ang duha ka tawo, si Jose ang gitawag og Barsaba … ug si Matias. Ug nag-ampo sila nga ming-ingon, ‘Ikaw, O Ginoo, nga nasayod sa kasingkasing sa tanan, ipakita kinsa siya niining duha ang imong gipili … ug ang ripa nahulog kang Matias ug gilakip siya pag-ihap sa napulog-usa ka apostol” (Buh.1:23-26).
Hinaot unta nga ingon gayod niini ang mahitabo sa umaabot nga Conclave, nga ang Kabubut-on gayod sa Ginoo, sa Espiritu Santo, maoy pagasundon, ug dili ang kabubut-on sa mga Kardinal nga adunay personal nga agenda nga sukwahi sa agenda ni Ginoong Hesus alang sa iyang Simbahan.
Kay kon ang ilang kaugalingon lamang kabubut-on, ang personal nga agenda, maoy pagasundon, nan, sama nila ni Simon Pedro, wala gayoy makuha. Sa laing pagkasulti, walay makuha alang sa Simbahan nga tiunay nga magatamod sa Ebanghelyo bisan kon kini dili makapahimuot sa daghan apan makapahimuot sa Diyos.
Hinuot unta nga ipadaplin sa mga Kardinal ang personal nga agenda ug ang Kabubut-on sa Espiritu Santo mao gayoy ilang pagasundon, sama nga sila si Simon Pedro ug mga kaubanan mituman sa sugo ni Ginoong Hesus nga nag-ingon, “Itaktak ang inyong baling sa tuo sa sakayan, ug makakaplag kamo”.
Hinaot unta nga niining maong Conclave 2025, matuman ang Kabubut-on sa Ginoo inay ang kabubut-on sa mga Kardinal kinsa adunay kwestiyonabling katuyoan alang sa Simbahan. Hinaot unta nga niining higayona ipatigbabaw sa Ginoo ang iyang Balaan nga Kabubut-on alang sa iyang Simbahan.
VENI, CREATOR SPIRITUS … O, pilia ang tawo nga dili mokompromiso sa mga kamatuoran nga gilatid ug gipakamatyan ni Ginoong Hesu-Kristo diha sa Krus!