Kasamtangan nga nag-imbestigar ang Philippine National Police–Anti-Cybercrime Group (PNP-ACG) sa usa ka deepfake video ni Presidente Ferdinand Marcos Jr. nga nag-promote kuno og usa ka online trading platform.
Sa usa ka interview sa mga tigbalita, ang direktor sa PNP-ACG nga si Brigadier General Bernard Yang niingon nga nakig-alayon na sila sa social media platform nga Facebook aron tangtangon ang malisyusong video samtang gipreserbar ang digital footprint niini isip ebidensya alang sa pagpasaka og kaso.
“For sure, makukuha naman natin who’s behind that video. Sa ngayon, hinihintay lang namin ‘yong result from the social media platform,” matod ni Yang.
Niingon si Yang nga ang PNP-ACG nakahimo sa pagsubay sa pipila ka mga indibiduwal luyo sa nangaging mga deepfake video nga nagtarget sa ubang mga high-profile nga personalidad, lakip na ang mga negosyante.
Gipasabot niya nga ang giusab nga mga video kasagarang gigamit sa nagkalainlaing matang sa mga scam.
“We received several complaints victimizing high-profile individuals at marami tayong mga ginagawa rito, ongoing ang investigations. ‘Yong isa, we are already in the process of applying for a cyber warrant,” sumala ni Yang. / TPM /SunStar Philippines