Nagsugod na og imbestigar ang Lapu-Lapu City Police Office (LCPO) bahin sa gikatahong giguba ang pipila ka mga dekorasyon nga gibutang sa mga kadalanan alang sa 48th Asean Summit.
Matod ni Police Colonel Kimberly Molitas, PRO 7 Chief of Staff ug kasamtangang Asean spokesperson, ilang gihimo ang tanang paagi aron mailhan ang responsable sa pagdaot sa maong mga dekorasyon.
Gipasabot niya nga pundo sa gobiyerno ang gigamit sa maong mga dekorasyon, busa angay lamang nga panalipdan kini ug pasakaan og kaso ang nihimo sa maong vandalism.
Nipahimangno sab ang Police Regional Office 7 ngadto sa publiko nga magtinabangay sa pagpanalipod sa mga kabtangan sa gobiyerno, tungod kay kini gikan sa buhis sa katawhan.
Gibutyag sab niya nga ang tanang CCTV camera sa Dakbayan sa Lapu-Lapu konektado sa Multi-Agency Command Center (MACC), lakip ang mga feed gikan sa Sugbo ug Mandaue, aron mabantayan ang kalihukan sulod sa 48th Asean Summit.
Gisusi na karon sa kapulisan ang mga CCTV footage sa matag eskina sa Lapu-Lapu City aron mailhan ang responsable sa pagguba sa mga dekorasyon.
Apil sab niini ang pag-monitor sa deployment sa polis ug militar alang sa seguridad sa mga delegado.
Una na nga nihangyo si Mayor Cindi King-Chan sa kapulisan nga mailhan ang nagguba sa mga dekorasyon nga gibutang sa Barangay Ibo, nga agianan sa convoy sa Asean delegates.
Sa iyang post sa social media, gipahibalo sab sa mayor nga maghatag siya og reward sa bisan kinsa nga makatabang sa pag-ila sa nihimo sa pagguba. /
