Mihimo na og entomological survey kun pagsusi ang City Health office sa Dakbayan sa Bogo, Sugbo aron sa pagsuta sa mga lugar nga posibling puy-an sa mga lamok nga magdala og dengue virus.
Gipahibawo sa kagamhanan nga sayo kini nga lakang aron paglikay nga mosaka ang mga kaso sa dengue, ilabi na sa mga bata sa siyudad.
Nalakip sa pakisusi nga gihimo ang paglibot sa 29 ka mga barangay sa siyudad, ug ang pagpahinumdom sa mga residente nga dili magbutang og mga containers o bayanan nga mahimong kapuy-an sa mga pito-pito (larvae).
Ugaling may makita nga mga pito-pito sa mga barangay, ipaubos kini sa examination pinaagi sa microscope aron masuta kon unsa nga species sa lamok kini nahisakop.
Nunot sa padayong gihimo nga survey, lakip usab ang padayon nga pagpahimangno ug pagpahibawo sa mga tagbalay nga paninguhaon ang pagpanglimpyo sa palibot matag adlaw ingon man ang pagyabo sa napundo nga tubig nga mahimong puy-an o pangitlugan sa mga lamok.
SUBLING GIPAHINUMDOM
Ang Department of Health (DOH) Central Visayas, una na nga mipahinumdom nga kanunayon ang paglimpyo sa tanang mga sudlanan sa tubig o mga bayanan nga posibling kapuy-an sa lamok ilabi na sa gitawag nga Aedes Aegypti nga nagdala sa dengue virus nga sagad motago sa mga ngiob nga lugar.
Dugang pagpasabot sa buhatan nga bisan kon mayabo na ang tubig, posibli gihapon nga mahabilin ang mga itlog sa containers nga molungtad pa hangtod sa usa ka tuig hinungdan nga mahimong modaghan gihapon ang mga lamok sa maong lugar.