Gilibkas na sa Department of Environment and Natural Resources (DENR) 7 ang cease and desist order (CDO) sa Binaliw landfill, apan dili pa dayon makapadayon ang Cebu City sa paglabay sa basura didto tungod kay kinahanglan pa kini moagi sa laing procurement process uban sa landfill operator.
Matod sa chief of staff ni Mayor Nestor Archival, Kenneth Siasar, sa press conference niadtong Lunes, Agusto 24, 2026, nadawat sa siyudad ang opisyal nga komunikasyon gikan sa DENR niadtong miaging semana nga nagpahibalo sa paglibkas sa CDO.
Ang maong kalambuan nahitabo samtang nagpadayon ang Cebu City sa pagpangita og paagi aron mabalik ang paglabay sa ilang basura sa Binaliw, diin gisuspenso ang disposal human sa pagkahugno sa landfill niadtong Enero 8 nga nipatay sa 36 ka trabahante ug usa ka boluntaryong rescuer.
Apan matod ni Siasar, ang paglibkas sa CDO wala magpasabot nga deretso na ang Cebu City nga makalabay sa basura sa Binaliw.
Kinahanglan pa nga moagi ang dakbayan sa procurement process, lakip ang laing bidding alang sa garbage disposal services.
Matod ni Siasar, tulo na ka higayon nga nagpahigayon og bidding ang siyudad alang sa disposal contract sa Binaliw, apan wala mosumiter og bid ang Prime Integrated Waste Solutions (PWS) Cebu, ang operator sa landfill, sa bisan hain niadtong mga bidding.
Matod niya, naglaom ang dakbayan nga ang hingpit nga paglibkas sa CDO makadasig na sa PWS nga moapil sa sunod nga bidding.
“If the cease-and-desist order is fully lifted, we hope that they will participate in the next bidding,” matod ni Siasar.
Si General Manager Niño Abellana Jr. una na nga nipahayag atubangan sa City Council atol sa executive session niadtong Agusto 11 nga bukas gihapon ang kompanya sa pag-apil sa umaabot nga Cebu City bidding alang sa garbage disposal sa higayon nga masulbad na ang regulatory issues sa Binaliw.
Niapil ang kompanya sa unang bidding niadtong Mayo apan na-disqualify atol sa post-qualification tungod sa mga isyu sa dokumentasyon.
Human niadto, nakahukom kini nga dili na moapil sa mga mosunod nga bidding samtang naghuwat sa hingpit nga paglibkas sa DENR-EMB order. / CAV