DepEd Cebu Province miklaro bahin sa student dropouts
Gibadlong sa Department of Education (DepEd) Cebu Province Division ang niaging taho nga nagbutang sa Probinsya sa Sugbo nga adunay labing daghang mga estudyante nga nag-dropout.
Si Division Superintendent Dr. Senen Priscelle Paulin niklaro nga ang ilang dropout rate anaa lang sa 1.12 porsyento, ubos kaayo sa 2% nga makapaalarma nga marka sa DepEd.
Matod ni Paulin, ang gitaho nga mga numero lagmit naghiusa sa datos gikan sa tanang mga school division sa Probinsya sa Sugbo lakip na ang independenteng mga siyudad sama sa Mandaue, Lapu-Lapu, ug Talisay, nga wala ubos sa hurisdiksyon sa Cebu Province.
“Our learners number around 650,000. Even if 6,500 drop out, that’s still just one percent,” pasabot ni Paulin.
Ang gagmay nga mga division nga adunay 80,000 ka mga estudyante ug 900 nga nag-dropout nagpakita og 1.13% nga rate o mas taas pa, nga naghimo sa mga numero sa Sugbo nga mas ubos sa proporsyon. Gihisgutan ni Paulin ang kakabus ug taas nga pag-absent lakip sa nag-unang mga hinungdan sa pag-dropouts sa eskwelahan.
Aron kini masulbad, iyang gimandoan ang mga magtutudlo sa paghatag og modular materials—usa ka praktis nga gihimo gikan pa sa panahon sa pandemya – ngadto sa mga estudyante aron makaapas gikan sa taas nga pagpalta og klase.
"When students are absent, we give them modules so they don’t feel disconnected," batbat ni Paulin.
Ang division nagpahigayon usab og kampanya aron mabawi ang tanang mga estudyante nga angay deretsong ma-enrol base sa ilang pag-uswag gikan sa Grades 1 hangtod 9.
Ang sayo nga pagpalista niadtong Enero nakatabang sa pag-establisar sa standard nga mga numero, apan matod ni Paulin nga ang ilang tumong dili lang ang pagpanglista apil na niini ang pagdani sa mga estudyante nga pabiling motungha.
“Let’s make schools more interesting. We can’t expect students to return if we don’t give them a reason to stay,” asoy ni Paulin. / EHP