NAGPAABOT ang Department of Education (DepEd) nga duna pay daghang mga estudyante nga magpa-enroll sa mosunod nga mga adlaw nunot sa pagsugod na sa klase sa Lunes, Hunyo 16, 2025.
Si Lyra Llagan, ang Cebu City assistant Schools Division Superintendent, niingon sa usa ka interview nga 103,000 ka tinun-an ang na-enroll sa mga pampublikong eskwelahan sa unang adlaw sa klase.
Naglaum siya nga modaghan pa kini samtang magpadayon ang klase.
Matod ni Llagan gamay ra nga isyu ang ilang nasugatan sa unang adlaw sa klase ug iyang gihulagway nga “malinawon.”
Mahitungod sa problema sa mga classroom, andam na ang DepEd pinaagi sa paggamit sa shifting system.
Sa pagbalik sa klase sa buwan sa Hunyo, niingon si Llagan nga mas haom karon kon itandi sa miaging mga tuig nga mahuman ang klase sa init kaayo nga buwan sa Mayo.
Ubos ang enrollment
Gihulagway sa DepEd Mandaue City Division ang pagbalik sa klase sa School Year 2025–2026 nga malinawon ug hapsay.
Matod ni Schools Division Superintendent Bianito Dagatan, way dagkong problema ang na-report gikan sa mga pampublikong eskwelahan sa siyudad sa unang adlaw sa klase.
"So far, we have not received any issues or complaints from the schools. Everything is manageable. The only concern at the moment is the presence of late enrollees," matod ni Dagatan.
Pagka Sabado, Hunyo 14, ang division naka-record lang og kapin sa 50,000 ka estudyante nga na-enroll, mas minos kon itandi miaging tuig nga mga 63,000 ka enrollees.
Si Dagatan pabiling malaumon nga mosaka pa ang gidaghanon tungod kay nagpadayon pa ang pag-abot sa mga ulahi nga nagpa-enroll.
Matod niya nga ang ubang mga estudyante basin uwahi na mopa-enroll tungod sa lainlaing rason sama sa pagbalhin og eskwelahan, ang mga ginikanan nga dili pa maka-enroll tungod sa mga obligasyon sa trabaho, o nibalhin og bag-ong pinuy-anan.
Ang DepEd Mandaue nagpadayon sa pag-monitor sa sitwasyon sa pakigtambayayong sa mga school head aron masiguro ang hapsay nga pagbukas sa bag-ong tuig sa klase.
Enrollee sa Kinder
Ang gipaabot nga pagdaghan sa mga enrollee sa kindergarten gilauman nga dako og ikatampo sa kinatibuk-ang enrollment sa Mandaue City Central School alang sa School Year 2025–2026.
Matod ni Principal Louwela Guerrero sa tunga-tunga sa Hunyo, ang eskwelahan nakaabot na sa 79.13% sa ilang target enrollment nga adunay 2,950 ka estudyante nga opisyal nga narehistro gikan sa Kindergarten hangtod sa Grade 6.
Nagtuo si Guerrero nga modaghan ang ilang enrollment karon itandi sa miaging tuig nga kapin sa 3,000 ka estudyante, labi na nga gilugway sa DepEd ang pag-enroll sa kindergarten hangtod Oktubre 31.
Bisan pa sa nagkadaghan nga estudyante, gipaniguro niya nga wala silay pagkuwang sa mga classroom.
Malinawon unang adlaw sa klase sa Lapu-Lapu City.
Gi-report sab sa DepEd Lapu-Lapu City Division ang malinawon nga pag-abli sa klase sa Lunes, Hunyo 16.
Matod ni Schools Division Superintendent Marilyn Andales sa interview sa SunStar Cebu nga personal niyang giduaw ang Gun-ob Elementary School ug Science and Technology Education Center sa Barangay Basak aron masiguro ang hapsay nga pag-abli sa klase.
Base sa inisyal nga assessment, ang tanang 71 ka eskwelahan sa mainland ug Olango Island anaa sa maayong kondisyon. / JPS / CAV / DPC / Zenn Dee Tejero, CNU Intern / Trixcy Shien Cobarde, Benedicto College Intern