Giuswag sa Department of Education (DepEd) ngadto na sa unang semana sa Septiyembre ang pagpahigayon sa gitakda nga nationwide school safety drill nga himuon karon unta'ng adlawa, Martes, Agusto 25, 2026.
Kini gumikan sa pagpasuspenso sa face-to-face classes sa pipila ka mga dapit sa nasod tungod sa dauta'ng kahimtang sa panahon.
Base sa giluwatan nga opisyal nga pamahayag sa DepEd, ipahigayon na ang drill sa sunod semana o sa unang semana sa Septiyembre 2026.
Nipasabot ang departamento nga ang maong postponement usa sab ka higayon aron mahiusa ang mga opinyon sa mga eksperto ug mga pamaagi nga base sa ebidensiya aron mapalig-on ug mas epektibo ang safety drill.
Niadtong Dominggo, Agusto 23, 2026, ang Philippine Psychiatric Association (PSA) ug Philippine Society for Child and Adolescent Psychiatry ang niawhag sa DepEd nga i-uswag ang maong kalihukan.
Matod sa mga grupo, mahimong ma-expose ang mga estudyante sa “hyper-realistic” o sobra ka tinuod nga mga bayolente nga scenario nga mahimong hinungdan sa pyschological harm ngadto sa kabataan.
Matod sa PSA, wala’y igo nga ebidensiya nga nagpakita nga ang maong mga simulation makapakunhod sa gidaghanon sa mga biktima o makapugong sa mga insidente.
“School safety is best strengthened through measures that protect without causing trauma. Locks, controlled entry points, and perimeter security should be prioritized. Protocols must be trauma-informed, with clear advance notice and the involvement of guidance counselors, psychologists, psychiatrists, and child psychiatrists,” pasabot sa PSA.
Gidugang niini nga ang mga protocol kinahanglang nakasentro sa trauma, adunay klarong pahibalo daan, ug apil sa maong kalihukan ang mga guidance counselor, psychologist, psychiatrist ,ug child psychiatrist.
Gidasig sa PSA ang matag eskwelahan nga magpahigayon una og needs assessment sa dili pa mopatuman og mga drill aron maseguro nga ikonsiderar ang talagsaong kahimtang sa ilang komunidad.
Una nang gimando sa DepEd ang mga eskwelahan nga maghimo o mag-update sa ilang School Contingency Plan for Active Attack Incidents ug ipaambit ang final ug aprobado nga plano sa ilang tagsa-tagsa ka local government unit (LGU), Philippine National Police (PNP) ug parent-teacher associations. / TPM/SunStar Philippines