Namahayag karon ang Department of Education (DepEd) nga dili nila i-tolerate ang bullying sulod sa mga tunghaan ug nagduso karon og mga programa alang sa luwas nga komunidad sa pagkat-on.
Dugang sa ahensiya nga seryuso sila sa pagdala sa matag kaso sa pagdaugdaog o bullying samtang nagpahigayon sa paspas nga lakang aron masiguro ang luwas ug masuportaran ang mga dapit sa pagtuon alang sa tanan.
"Under the leadership of Secretary Sonny Angara, principal author of the Anti-Bullying Act of 2013 (RA 10627), DepEd is pushing forward with a strong and clear commitment to child protection," matod niini.
"DepEd remains committed to working with parents, teachers, and communities to ensure learners feel safe and empowered in schools."
Sa Senate hearing niadtong Martes, matod ni Angara nga anaa sa 1,314 ka mga kaso sa campus violence ang natala gikan Nobiyembre 24, 2022 hangtod Abril 7, 2025, katunga niini nahimo sa mga estudyante.
Ang DepEd niingon nga kanunay kini nga nagpahigayon og comprehensive assessment aron masiguro nga ang mga child protection committee sa mga eskwelahan aktibo ug epektibo.
Dugang pa, gipalapdan sa DepEd ang mga serbisyo niini alang sa kahimsog sa pangisip sa mga eskuylahan ug gibag-o ang pagpatuman sa mga lagda ug regulasyon sa Anti-Bullying Act ug Safe Spaces Act aron matubag ang mga makabag-ong pagdaugdaog, sama sa online harassment ug kapintasan sa mga kauban.
Ang gipauswag nga pagbansay alang sa mga guidance counselor, mga opisyal nga nagpanalipod sa bata, mga pangulo sa eskuylahan, ug mga ginikanan nagpadayon usab aron mapalig-on ang mga paningkamot batok sa bullying.
Sugod sa School Year 2025-2026, ang K to 10 curriculum mopalalom sa values formation ug maglakip na sa anti-bullying lessons ngadto sa mga subject, sama sa Good Manners and Right Conduct (GMRC), Values Education, ug Edukasyon sa Pagpapakatao, matod sa departamento.
Samtang, ang mga estudyante nga nangdaugdaog sa uban, mopaubos sa pagtambag, magpunting sa empatiya, accountabilty, ug pagbag-o sa pamatasan.
Una niini, nag-viral sa social media ang usa ka kaso sa giingong bullying diin usa ka babaye ang giatake sa daghang mga classmate sulod sa classroom sa Bagong Silangan High School. / PNA