Nakabsan gyud sa iyang kinabuhi ang usa ka maestro nga nag-attend og Bible study human siya matod pa naggolgol sa iyang liog atubangan sa iyang mga kauban alas 4 sa hapon sa Sabado Enero 25, 2025, sa Barangay Talayong, Lungsod sa Badian.
Ang biktima giila nga si Richard Calumba, 29, lumad nga taga Barangay Carol-an, Dakbayan sa Kabankalan, Negros Island Region (NIR) apan kasamtangang nagpuyo sa Life Changing Campus (Bible School) sa Barangay Tuble, Lungsod sa Moalboal.
Sa nakuhang inpormasyon gikan sa kapulisan, nasayran nga gidala sa mga staff sa Life Changing Campus sa Badian District Hospital ang biktima sa Biyernes, Enero 24, human nila nabantayan nga adunay gihambin nga problema.
Usa ka Seremy Ferrer, staff sa tunghaan maoy usa sa nikuyog sa biktima sa hospital.
Apan nakugang sila kay kalit kini nga nawala sa tambalanan.
Pagka Sabado sa buntag, Enero 25, adunay nipahibalo kanila nga niadto siya sa Barangay Talayong, Lungsod sa Badian hinungdan nga si Ferrer ug mga kaubang staff nagdali sa pag-adto.
Gimaymayan ni nila apan nipalayo kanila hangtod nga nakakuhag sundang daplin sa dalan og gigulgol ang iyang liog.
Gidali sa pagdala ang biktima sa tambalanan apan nabugtoan gyud sa iyang kinabuhi.
Nasayran nga nagpa-ranking sa DepEd ang biktima nga usa ka licensed teacher apan wala siya maapil sa lineup. / GPL