Lalaki nga giingong dunay depression napalgang patay nga nagbitay sa kahoy sa kalibunan nga bahin sa Sitio Kabogohan, Barangay Poblacion Pardo, dakbayan sa Sugbo alas 11:45 sa buntag sa Lunes, Abril 8, 2024.
Ang biktima giila sa iyang igsuon nga si Christopher Reyes Felisarta, 47, nagpuyo sa Sitio San Roque, Barangay Bulacao, dakbayan sa Sugbo.
Matod ni Police Staff Sergeant Jaymos Tordios, information officer sa Inayawan Police Station, nga usa ka residente nga nangahoy sa maong lugar ang unang nakakita sa biktima nga nagbitay sa punoan sa Avocado gamit ang nylon nga pisi nga gihigot sa iyang liog.
Dali ni nga nipahibawo sa barangay labot sa maong lalaki nga gi report usab dayon sa Inayawan Police Station. Niresponde usab dayon ang ambulansya sa Kagamhanan sa Dakbayan sa Sugbo apan sa ilang paghiling nakabsan na gyud kini sa kinabuhi.
Matod sa igsuon sa biktima nga nahinabi sa imbestigador sa Inayawan Police Station nga dunay depression ang biktima. Gani sa miaging tuig ila ning gipaubos sa rehabilitation.
Giingong tiggamitan ang biktima sa ilegal nga drugas ug sa dihang nagsugod na ang depression niini, nihukom ang pamilya nga ipaubos sa rehabilitation.
“Sa una kuno maong na rehab pag last year. After sa rehabilitation nag suffer na ang depression nya nag mild stroke pa gyud,” matod ni Tordios. / AYB