GIPAHIBALO sa bag-ong napiling Mayor sa Mandaue City, Thadeo “Jonkie” Ouano, nga ipabilin niya ang kasamtangan'g mga department head sa City Hall.
Apan, nagpagawas siya og pahimangno nga gipaabot ang hingpit nga kooperasyon sa bag-ong administrasyon.
Matod ni Ouano, ang bisan unsang porma sa pagsabotahe o dili pagkooperar dili niya palabyon, ug mahimong mapahamtangan og silot ang mga tinuyong mohasol sa trabaho.
“Nanghinaut ko nga usa ra atong agenda dinhi—suportahan lang. Ayaw ta og i-sabotahe kay mapugos ko pagpahamtang og silot,” matod pa sa mayor.
Iyang gipasabot nga bisan way ilisan sa pagkakaron, magbutang siya og mga tawo sa matag departamento nga direktang mo-report kaniya aron mas sayon ang transisyon ug komunikasyon.
Kini tungod kay bag-o pa lang siya sa posisyon ug wala pa kaayo kaila sa mga kawani.
Gihimo ni Mayor Ouano kining pamahayag sa iyang unang adlaw sa katungdanan, Martes, Hulyo 1, 2025, ug gibisita niya ang nagkalain-laing departamento sa Mandaue City Hall aron personal nga makig-istorya sa mga empleyado ug maminaw sa ilang mga yangongo sa panarbaho.
SUWELDO LANGAY
Usa sa mga dagkong kabalaka nga nitumaw atol sa unang tigom niadtong Lunes, Hunyo 30, uban sa mga department head mao ang pagkalangan sa pagpagawas sa sweldo sa mga Job Order (JO), Contract of Service (COS), ug Clean and Green nga kawani.
Gibutyag ni Mayor Ouano nga moabot sa 4,000 ngadto sa 5,000 ka trabahante ang nalangan ang sweldo sulod sa duha ngadto sa upat ka bulan, nga dako og epekto sa ilang panginahanglan. / Zenn Dee Tejero, CNU Intern