Gipasalig ni Cebuano sportsman Lou Ornopia nga dili mawagtang sa panumdoman ang pagpahigayon sa duha ka mga adlaw nga silver anniversary race sa Ornopia Motocross Cup nga sugdan karong adlawa, Abril 13, 2024, sa MS Motosuit Motorsports Park sa Barangay Calambua, lungsod sa San Remigio, Cebu.
Si Ornopia, kinsa giila nga amahan sa Cebu motocross, nagkanayon nga atol sa kalihukan, hatagan og pasidungog ang legendary riders nga naghatag og kinabuhi sa motocross sa Sugbo.
Gipangtumbok mao sila si Jon-jon Adlawan, Pepo Rubi, Jubenile ug Giovanni Abellar, John Flores, BJ Pepito, Siegfred Ornopia, Denmark Supatan, Irwin Uypitching, Donkey Sanchez, Nelson Sicad, Gener Sicad, Ayen Ledesma, Roscel Gungob, Jun Enriquez, Jonathan Cuyos, Butch Flores, Rex Barbaso, Rey Querol, Jougie Basco, JC Obligado, Felipe Montejo, Dandan Gastador, Tommy Largosa, ug anhing Nonoy Reluya.
“Ato pasidunggan ang bangiitan natong mga riders kay kini sila maoy naghatag og kinabuhi sa atong mga lumba sa nanglabayng mga katuigan,” pamahayag ni Ornopia nga gipadangat sa Cebu sports media.
“Ato sila hatagan og importansiya pinaagi sa paghandum sa mabulokon nilang kagahapon.”
Kapin sa P150,000 ang kinatibuk-ang ganti nga salapi ang ipangtunol ngadto sa mga mananaug sa lumba, nga gipaluyohan nila ni Cebu 4th District Rep. Janice Salimbangon, San Remigio Mayor Atty. Al Pestolante, Kier Louie Ornopia, Edwin Dilao, Jason Maceren ug sa F&FO Motor Parts, RMO Partshoppe, NF Enterprises, Repsol philippines,Kawasaki, Kapenarra, SNR MBJ Motomaze, Shine N Style, LMO Motorparts and General Merchandise.
Gipahibalo ni Ornopia nga usa ka brand new RUSI Moped 125cc motorcycle ang i-raffle, kortesiya sa Rusco Motors ni Uypitching.
Aduna say ipa-raffle nga motor parts, gloves, jackets ug helmets nga gikan kang Mike Stoddar alang sa tanang mga partisipante.
Sa dili pa sugdan ang makapaukyab nga lumba, adunay opening program nga ipahigayon diin motambong isip pinasiduggang dinapit si Engr. Susan Ornopia-Aroa, kinsa maoy Assistant District Engineer sa Cebu 1st District Engineering Office ubos sa Department of Public Works and Highways (DPWH)-Central Visayas.
Nidugang si Ornopia nga motambong sab ang iyang mga igsuon nga sila si Fiel, Boy ug Noli.
Nagpasalamat sab si Ornopia sa suporta sa iyang asawa nga si Crinita, kasamtangang barangay captain sa Calambua ug ABC President sa San Remigio.
Matod ni Ornopia nga ang kita sa lumba ihatag isip donasyon alang sa tukuron nga bag-ong kapilya sa Calambua agi’g pahinungod sa mahal nga patron San Vicente Ferrer. / ESL