Hugot nga gihimakak sa kapulisan sa Probinsya sa Sugbo ang mikatap nga post sa social media nga ang mga polis ug personnel sa Bantay Dagat sa Lungsod sa Carlos P. Garcia ang nakabangga sa pumpboat nga gisakyan sa duha ka mananagat nga namatay sa Isla sa Malingin, Lungsod sa Bien Unido sa Biyernes sa buntag, Mayo 2, 2025.
Ang duha ka mananagat nga silang Rene Awas Reyes ug B-Jay Manayon alyas Budon nanagat gamit ang libaliba usa ka matang sa ilegal nga pamaagi sa panagat.
Nipasangil ang pipila ka mga residente sa dapit nga ang nakabangga sa sakayan sa duha ka biktima iya sa mananakop nga taga Pitogo nga giluwanan sa mga polis ug Bantay Dagat.
Human madawat ang kasayuran sa Bohol Police Provincial Office (BPPO) ang hepe niini nga si Police Colonel Arnel Banzon nimando dayon sa hepe sa Bien Unido Police Station nga makig-alayon sa Carlos P. Garcia Municipal Police Station, Ubay PNP ug Talibon nga mopaubos sa ilang imbestigasyon aron maklaro ang pasangil diha sa social media.
Sa imbestigasyon sa maong mga police station, nasuta nga walay kalambigitan ang kapulisan sa Carlos P. Garcia.
Suma sa hepe nga si Police Lieutenant Conrado Butil nga wala sila mopahigayon og Coastal Law Enforcement Operation gikan sa Mayo 1-2, 2025.
Mao usab ang pangangkon sa hepe sa Ubay nga si Police Captain Amelito Melloria, Police Major Romar Labasbas sa Talibon ug Ubay Municipal Police Station Police, Lieutenant Jotham Guminingin.
Nakig-alayon na usab ang mga imbestigador sa mga lokal nga mananagat sa Lungsod sa Bien Unido ilabi niadtong nakasaksi ug nasuta nga ang usa ka motorbanca nga nakabangga sa mga biktima gihulagway nga tulo ang makina nga color pula nga gisakyan sa mga lalaki apan wala matino kon pila kabuok.
Human mabanggai ang sakayan sa mga biktima nga color apple green nga single engine dali nga nisibat ang nakabangga paingon sa Lungsod sa Carlos P. Garcia.
Nipasalig ang BPPO sa pamilya sa mga biktima nga ilang paningkamutan nga mailhan sa labing dali nga panahon ang mga responsable aron mahatagan og hustisya ang kamatayon sa duha ka mananagat.
Si Banzon nimando sa hepe sa Bien Unido nga paspasan ug palawman ang himuon nga imbestigasyon. / AYB