NAGKAUYON ang mga kompanya sa petrolyo nga ipatuman ang eskedyul nga pagsaka sa presyo sa lana karong semanaha sa hinayhinay nga paagi aron makatabang nga maibanan ang epekto niini sa mga apektadong sektor.
Kini maoy gipahibalo sa Department of Energy (DOE) niadtong Lunes, Hunyo 23, 2025.
Matod sa DOE, ang hinayhinay nga pagpatuman gikauyonan atol sa panagtagbo ni officer-in-charge (OIC) Sharon Garin, undersecretary Alessandro Sales, ug mga representante sa mga kompanya sa lana.
“Hindi naman namin madiktahan kasi wala na kasi sa puder ng DOE at kailangan i-check nila ang kanilang mga financials nila.
“This is really a request out of the goodness of their hearts. Hindi ito pwedeng maipose kasi it is a deregulated industry,” matod ni Garin.
“So ang proposal sana halimbawa kung may, kung (may P4) man ang increase, dahan-dahan lang sana at hindi biglaan na four pesos agad in one day,” iyang gidugang.
Sa usa ka pamahayag, giawhag sa OIC sa DOE ang mga kompanya sa lana nga dugangan ang gidaghanon sa ilang mga estasyon nga nagtanyag og diskuwento sa gasolina alang sa sektor sa transportasyon.
Matod ni Garin, makigtagbo sila sa mga departamento sa Transportation (DOTr) ug Agriculture (DA) aron hisgutan ang paghatag og subsidy sa mga public utility driver ug mag-uuma kon ang average nga presyo sa krudo molapas sa $80 matag baril.
Ang presyo sa krudo anaa karon sa $75.16 matag baril.
Sa sayo pa, base sa banabana sa DOE-Oil Industry Management Bureau, ang presyo sa gasolina mosaka og P2.50 ngadto sa P3 matag litro, diesel sa P4.30 ngadto sa P4.80 matag litro, ug kerosene sa P4.25 ngadto sa P4.40 matag litro karong semanaha. / TPM / SunStar Philippines