MAG-ATUBANG og silot ang tag-iya sa usa ka pribadong dialysis ug diagnostic center sa Bogo City tungod sa di saktong paglabay sa hazardous medical waste nga gilabay daplin sa karsada sa Barangay Libjo, Tabogon niadtong Hunyo 24, 2025.
Sumala sa Department of Environment and Natural Resources–Environmental Management Bureau (DENR–EMB) 7, ang establisemento napakyas pagpakita og saktong disposal permits ug ubang dokumento atol sa ilang imbestigasyon.
Usa ka Notice of Violation ang i-isyu sa tag-iya sa pasilidad, nga mahimong mag-atubang og multa nga gikan sa P10,000 ngadto sa P50,000, depende sa kabug-at sa kalapasan ubos sa Republic Act 6969, ang Toxic Substances and Hazardous and Nuclear Wastes Control Act of 1990.
Usa ka technical conference ang gikatakda sunod semana aron tugotan ang respondent nga makapatin-aw .
Labing menos 10 ka yellow plastic bags nga dunay sulod nga mga gimamit nga syringes, dialysis tubing, ug blood collection tubes ang nakit-an sa usa ka hilit nga dapit daplin sa karsada duol sa mga eskwelahan ug kabalayan sa Barangay Libjo.
Gihulagway ni Tabogon Mayor Francis Salimbangon ang insidente nga “makapaalarma kaayo” ug gimanduan ang Municipal Council ug kapulisan sa pag-imbestigar ug pagpasaka og kaso.
Sa interview sa SunStar Cebu niadtong Biyernes, Hunyo 27, si Ken Pajayat, hepe sa Chemical and Hazardous Waste Section sa EMB 7, niingon nga ang ilang mga kawani nakasubay sa basura ngadto sa healthcare facility nga nakabase sa Bogo pinasikad sa field investigation ug koordinasyon sa Tabogon Municipal Sanitary Health Office niadtong Hunyo 25.
Matod ni Pajayat, ang medical waste nakuha na ug gibalhin sa usa ka temporary storage facility samtang ang mga opisyal motapos sa ilang imbestigasyon . / CAV