Nag-atubang karon ang pribado nga dialysis ug diagnostic center sa Bogo City og silot tungod sa dili hustong paglabay sa mga delikadong medikal nga basura, nga nakit-an nga gilabay daplin sa dalan sa Barangay Libjo, Tabogon niadtong Hunyo 24, 2025.
Matod sa Department of Environment and Natural Resources – Environmental Management Bureau (DENR–EMB) 7, nga napakyas ang establisyemento sa pagpresentar og saktong disposal permit ug dokumentasyon atol sa ilang imbestigasyon.
Usa ka Notice of Violation ang gikatakda nga luwatan batok sa tag-iya sa pasilidad, nga mamahimong mag-atubang og multa gikan sa P10,000 ngadto sa P50,000, depende sa gibug-aton sa kalapasan ubos sa Republic Act 6969, ang Toxic Substances and Hazardous and Nuclear Wastes Control Act of 1990.
Usa ka technical conference ang ipahigayon sunod semana aron hatagan og kahigayonan ang maong dialysis ug diagnostic center nga makahatag sa ilahang pagpasabot ug mopresentar sa ilang mga dokumento.
Labing minos 10 ka yellow nga plastic bags nga adunay sulod nga ginamit nga mga syringe, dialysis tubing, ug blood collection tubes ang nadiskubrehan sa hilit nga dapit daplin sa dalan duol sa mga eskwelahan ug panimalay sa Barangay Libjo.
Si Tabogon Mayor Francis Salimbangon nihulagway sa maong insidente nga “very alarming” ug nimando dayon sa Municipal Council ug police sa pag-imbestigar ug pagpasaka og kaso.
Matod ni Ken Pajayat, hepe sa Chemical and Hazardous Waste Section sa EMB 7, nga ang mga medical waste nakuha na ug nabalhin na ngadto sa designated temporary storage facility samtang padayon pa ang imbestigasyon kabahin sa insidente.
Dugang niini nga ang healthcare facilities nga anaay hazardous waste gikinahanglan nga aduna'y ensakto nga pamaagi sa paglabay niini lakip na ang pag-label, pagdala o pagbiyahe niini, temporary nga storage, ug paglabay niini ngadto sa DENR-accredited treatment, storage, and disposal (TSD) facilities. / CAV