Giklaro sa Department of the Interior and Local Government (DILG)-Cebu Province nga ang ilang tahas sa transition team sa Kapitolyo usa ka kinahanglang pamaagi nga gibase sa nasudnong polisiya ug dili pamulitika nga adunay kalambigitan sa outgoing administration.
Gidepensahan ni DILG Cebu Provincial Director Dr. Jesus Robel Sastrillo Jr. ang iyang tahas isip co-chair sa transition team sa Kapitolyo human sa mga pahayag ni Governor-elect Pamela Baricuatro ug sa iyang transition team niadtong Biyernes, Mayo 30, 2025, nga sayo pa nikondena sa nalantawan nga adunay gidapigan ang DILG sa proseso sa transisyon.
“Wala mi nagpakabahin. We are only doing what is required under the DILG Memorandum. The role is not political, it is administrative,” matod ni Sastrillo sa usa ka interbyu sa telepono niadtong Biyernes, Mayo 30.
Nagbasi sa DILG Memorandum Circular 2025-016, nga naglatid sa guidelines sa transisyon alang sa bag-ong napiling mga opisyal sa lokal nga gobyerno nga giisyu niadtong Marso 18, si Sastrillo niingon nga kini nagmando sa paghimo sa usa ka Local Governance Transition Team (LGTT).
Ang guidelines nagtugot sa mga representante sa DILG nga moapil sa proseso aron maseguro ang transparency ug pagpadayon sa mga serbisyo.
Giklaro ni Sastrillo nga ang presensya sa DILG sa transition team ni Garcia — bisan isip co-chair — dili usa ka pagpakita sa pagkamaunongon sa outgoing nga gobernador apan usa ka paagi sa pagsuporta sa oversight ug hustong dokumentasyon.
Sa usa ka press conference niadtong Biyernes, si Baricuatro, kinsa nidaog batok kang Garcia sa usa ka makapakurat nga resulta sa eleksyon, nikuwestiyon sa baruganan sa DILG human gisultihan sa provincial director ang iyang team nga ang transition team ni Garcia mo-turnover lang sa mahinungdanong pinansyal nga mga dokumento ug rekord sa Hunyo 30, ang adlaw diin molingkod ang bag-ong administrasyon.
Dugang pa ni Baricuatro nga gidid-an sa outgoing nga gobernador ang mga hepe sa departamento nga makigtagbo sa iyang transition team.
Gikondenar usab niya ang DILG sa pagdawat sa usa ka posisyon sa pagpangulo sa usa ka transition body nga giumol ni Garcia, nga naghatod og sayop nga pagtuo bahin sa baruganan sa ahensya.
Ang kampo ni Baricuatro nangandam sa pagpasaka sa maong butang ngadto sa DILG Central Visayas ug sa central office kon ang outgoing administration dili modawat sa ilang hangyo sa positibo nga paagi. / EHP