Giawhag sa Department of Interior and Local Government (DILG) ang local government units (LGUs) sa pagdawat og cashless transactions subay sa paningkamot sa administrasyon alang sa digital transformation sa gobiyerno.
Sa usa ka pahayag niadtong Sabado, Mayo 17, 2025, ang DILG niingon nga nagpagawas kini og memorandum circular nga nagmando sa mga LGU sa pagpatuman og electronic payment and collection systems (EPCS) isip alternatibo sa tradisyonal nga cash transactions sama sa pagkolekta og buhis ug uban pang mga bayranan.
Ang mga LGU giawhag sa pagtanyag og luwas ug dali nga magamit nga digital options, pagsiguro nga ang payment channels sayon gamiton, ug makig-partner sa awtorisado nga providers, lakip na ang government servicing banks nga kinahanglang nahiuyon sa National Retail Payment System Framework ug sa Data Privacy Act.
Ang DILG niingon nga ang cashless transactions makapauswag sa transparency, efficiency, ug kasayon sa publiko.
“LGUs are also expected to define clear procedures for issuing electronic invoices and billing notices, consistent with guidelines from the Commission on Audit and the Bangko Sentral ng Pilipinas,” pamahayag sa ahensya. “To support full implementation, LGUs are encouraged to pass enabling ordinances and issue local policies. The DILG also committed to providing capacity-building initiatives to help LGUs adopt the system and guide constituents in its use.”
Apan giklaro sa DILG nga ang mga LGU kinahanglan pa gihapong modawat og cash ug uban pang tradisyonal nga mga pamaagi sa pagbayad aron masiguro ang accessibility alang sa tanan. / TPM