Patay nang nalandig sa tambalanan ang usa ka suspek sa pagpanglugos sa dihang nabuthan kay nangilog sa 9mm pistol sa arresting officer nga nakadakop kaniya sa hot pursuit.
Ang suspetsado sa reklamong rape giila nga si Anthony Bautista, 40, minyo, taga Sityo Candabong, Brgy. Jampang, Argao.
Atol sa inilugay, giingon nga disgrasya nga nabuthan ang biktima, naigo ang tiyan.
Kini ang gibutyag ni P/Maj. Janus Giangan, hepe sa kapulisan sa lungsod sa Argao, habagatang Sugbo, nga gikahinabi sa Superbalita Cebu sa Martes, Hunyo 11, 2024.
Matod niya nga ang insidente nahitabo ala 1:20 pasado sa hapon sud sa ilang patrol car samtang nagsubay sa national highway sa Brgy. Bulasa, Argao.
Si Giangan nagkanayon nga nagpahigayon sila sa hot pursuit operation gumikan sa sumbong sa usa ka inahan nga ang iyang 12 anyos nga anak dalagita gi-rape sa suspek sa makaupat ka mga higayon sukad sa Hunyo 8, 2024 ug sa Hunyo 9 ,2024 sa ilaha sa Sityo Candabong, Brgy. Jampang.
Ang bata wala dayon nakasumbong kay nahadlok.
Apan kagahapon sa Hunyo 10, namatikdan sa inahan nga nag bleeding ang kinatawo sa biktima ug didto na nakatug-an sa iyang gidangatan sa mga kamot sa suspek.
Ang bata gidala sa Bogo Argao District Hospital-Isidro C. Kintanar Memorial Hospital ug nasuta nga may samad ang kinatawo sa biktima.
Si Giangan niingon nga ang inahan sa bata alas 8 sa buntag, Hunyo 11, 2024, nidangop na sa ilang buhatan sa Argao.
Niporma dayon sila og team nga iyang gipangulohan ug didto na nila madakpi ang suspek sa hot pursuit operation sa Brgy. Lindogon, Sibonga, diin nagtrabaho.
Apan sa pagpadulong sa police station on board sa ilang patrol car, si Bautista giingon nga nireklamo nga sakit ang Iyang kamot nga gipusasan og binaklid mao nga ilang gibadbaran sa pusas kay ibalhin ang kamot sa atubangan. Didto, matod pa, nakahigayon ug ilog sa armas sa iyang sakop.
Si Giangan niingon nga sa inilugay disgrasyang nibuto ang armas ug naigo ang suspek.
Gidali nila pagdala sa ospital apan gideklarar nga dead on arrival. / DVG