Gawas sa Sugboanong si Roger Pogoy, napaslak sab sila si Aris Dionisio, ug rookie Christian David sa Philippine Basketball Association (PBA) Season 48 All-Star Weekend nga ipahigayon karong Marso 23-24, 2024 sa University of St. La Salle gymnasium sa Bacolod City.
Sila si Pogoy ug Dionisio nahimong sakop sa Team Japeth sa All-Star Game isip puli nila ni Tyler Tio ug kanhi MVP Scottie Thompson, kinsa pareho’ng adunay angol.
Kini maoy ikalimang All-Star apperance ni Pogoy, usa sa mga pambato sa TNT Tropang Giga, samtang premiro ni Dionisio, sakop sa Magnolia Hotshots.
Ikauban nila ni Pogoy ug Dionisio sa Team Japeth mao sila si Japeth Aguilar, Christian Standhardinger, Paul Lee, Calvin Oftana, Jamie Malonzo, Chris Newsome, Don Trollano, Marcio Lassiter, Arvin Tolentino, Maverick Ahanmisi, Stanley Pringle, ug Terrence Romeo.
Ang Team Japeth makigbatok sa Team Barroca nga gilangkuban nila ni Mark Barroca, June Mar Fajardo, Jason Perkins, CJ Perez, Robert Bolick, Jio Jalalon, Ian Sangalang, James Yap, Calvin Abueva, Jayson Castro, Gabe Norwood, Ricci Rivero, Cliff Hodge, Juami Tiongson, ug Nards Pinto.
Sa iyang bahin, si David, kinsa maoy No.2 overall pick sa Blackwater Bossing sa miaging rookie draft, maoy gipuli sa adunay angol nga si Rain or shine big man Keith Datu sa Team Stalwarts sa Blitz Game. / ESL