Diputado: Ang pagsaulog sa Sinulog 2024

Cuentas Claras
Diputado
Diputado(File Photo)

Daghan ang nagtuo nga ang padayon nga drama mahitungod sa pagselebrar sa Sinulog karong tuiga ang maghimo og dalan sa panagbulag sa Kagamhanan sa Probinsiya ug sa Siyudad sa Cebu.

Nahimo kini’ng paboritong sumsuman tungod kay mao man usab kini ang nahitabo sa miaging tuig.

Apan dili diay kini husto. Duna diay daghang mga panghitabo nga angay sab nga tukion aron matul-id ang hiwi nga pagtuo.

Migawas nga aduna diay sabotsabot mahitungod sa kapistahan sa Sinulog ug nasabutan nga adunay gitawag og Sinulog sa Lalawigan ug ang Sinulog Grand Parade nga pagahimuon sa lainlaing mga adlaw.

Imbes magkompetensiya ang duha ka mga kasaulogan, nahimo na hinuon nga nadugangan ang kasaulogan ug aduna nay daghan higayon nga ang katawhan dili lang sa Sugbo kondili hasta usab ang mga bisita gikan sa mga lainlaing lugar sa pagsaksi ug pag-apil sa maong mga kalihukan.

Mao kini ang maayong resulta sa panagsabot.

Ang usa nahimong duha ug gihimo kini sa lainlaing mga adlaw, susama sa “buy one, take one.” Kay bisan og duha ang nagsaulog, angay hinumdoman nga kining tanan alang ug tungod sa pagsaulog sa kapistahan ni Senyor Santo Niño.

Sa akong pagtuo, nalipay ang Bata ug wala na kini maghilak.

○ ○ ○

Ang kapistahan ni Senyor Santo Niño nahimo nang dakong kalihukan matag tuig sa daghang tawo sulod ug gawas sa lalawigan sa Sugbo nga mga deboto sa Bata.

Gihimo na kining tinuig nga panaad sa kadaghanan ug maoy hinungdan nga bisan sa kapit-os sa panahon ug kamahal sa mga palaliton, moanhi lang gihapon ang bagang hut-ong sa katawhan aron matuman ang ilang tinuig nga panaad.

Sama sa mahitabo sa lalawigan sa Bohol matag bulan sa Mayo nga maoy bulan sa mga kapistahan, sama sa mounlod og gamay ang lalawigan sa Sugbo tungod sa kabaga sa katawhan nga moanhi ug moapil sa mga kalihukan sa Sinulog.

Mag-awas-awas ang mga karsada ug magdasok ang katawhan sa lainlaing mga lugar sa siyudad sa Sugbo panahon sa Sinulog.

Ug usa kini sa mga hinungdan nga maglabad ang ulo sa katawhan tungod sa kagrabe sa trapiko.

Pun-an pa kini sa abusado’ng mga driver sa mga motorsiklo nga mahilig mag-counterflow aron lang makalusot bahala og unsay mahitabo. Anha makita nga seryuso gyod kaayo ang problema sa trapiko sa siyudad sa Sugbo.

Unsaon kaha kini pagsulbad?

○ ○ ○

Nagka-grabe na ang trapiko, aduna pa gyod mga construction project nga pagahimuon panahon sa panagdasok sa mga sakyanan.

Ngano kaha nga dili man kini himuon panahon sa kagabhion o sa panahon nga menos ang mogamit sa karsada?

Dili ba mahimo nga iapil kini sa kontrata nga ang pag-implementar sa proyekto pagahimuon sa paagi nga dili makamugna og dugang problema sa trapiko?

Dili ba mahimo nga paspason pagtrabaho ang mga proyekto sa gobiyerno sa paagi nga malikayan ang panagdasok sa trapiko unya iapil kini’ng pagbutang sa gilagdaan nga kontrata?

Mahimo man tingali nga magsabotsabot ang DPWH ug ang mga local government units (LGUs) mahitungod niini ubos sa pagtuo nga apil kini sa hustong serbisyo sa katawhan.

○ ○ ○

Tungod kay magdasok man gyod ang katawhan atol sa pagsaulog sa Sinulog, angay magmatngon ang tanan samtang maghudyaka.

Dili magpalabi sa ilang gibati pinaagi sa sobra nga paghubog-hubog, sobra nga pagsul-ob sa mahalon nga mga butang nga maoy mahimo’ng magnet sa mga kiriwan og kamot, magsul-ob og facemask aron paglikay sa mga delikadong kagaw, ug seguroon nga anaa sa hustong panglawas kon mogawas man gani sa panimalay ug moapil sa taas nga prosesyon o parade.

Kon adunay gibati sa lawas, mas maayo nga mopuyo na lang sa balay kay sa mogawas ug ibutang ang kaugalingon sa peligro.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph