Dihay usa ka higayon nga nakasaksi ko sa usa ka rally sa Alyansa sa Dakbayan sa Dumaguete niadtong Pebrero 20, 2025, ug daghan ang akong nakita didto.
Kahinumdoman, nahimong sumsoman sa social media ang gisulti ni Gov. Chaco Sagarbarria sa dihang human sa ikatulo ka higayon nga misinggit siya og ‘BBM!’ unya wala mosabat ang mga tawo, misulti siya nga "matay, mingaw man."
Makita sab didto nga nagwarawara si BBM sa iyang mga kamot atubang sa mga tawo apan wala lang maggunok ang mga tawo.
Atol sa maong kalihukan, nahibaw-an sab nako ang gibati nga kakuyaw o kakulba sa ‘handlers’ sa mga senador nga basin og madamay ang ilang mga kandidato sa ka-unpopular ni BBM ug nigawas nga imbes asset, nahimo na man hinuon nga liability sa mga kandidato pagka senador.
Atol sab sa maong kalihukan, akong nakita nga absent si Senador Imee Marcos ug wala maapil ang iyang pangalan sa mga kandidato nga gikampanya ni (Bongbong Marcos) BBM.
○ ○ ○
Dili unta ako gusto nga motuo sa maong panahom sa ‘handlers’ kay sa akong nahibaw-an, dako kaayong bintaha alang sa mga kandidato pagka senador kon moapil sa kampanya ang presidente.
Mao kini akong nahinumdoman panahon ni (Pres. Rodrigo Roa Duterte) PRRD, (Pres. Gloria Macapagal Arroyo) PGMA, Pres. Benigno Simeon ‘Nonoy’ Aquino III (P-Noy) ug uban pa.
Gawas nga maglunop ang katawhan nga mosaksi sa maong kalihukan, makita sab nga magbaha ang mga proyekto nga hisgotan alang sa maong lugar kon apil sa kalihukan sa kampanya ang presidente. Nasayod na kita kon unsa ka gamhanan ang presidente kon mga proyekto na ang hisgotan.
Pero lahi kaayo ang nahitabo sa mga kampanya sa Alyansa nga si BBM ang "main actor." Imbes mabibo o masadya, mamingaw na man hinuon. Gani, dunay panahon nga imbes moabiba ni BBM, mosiyagit na hinuon ang mga katawhan og ‘Duterte, Duterte, Duterte.’
Gani kon ikomparar ang mga kampanya sa Alyansa nga anaa si BBM ug sa kampanya sa PDP-Laban nga naa si PRRD, klaro kaayo ang kalainan - gawas sa naglawudlawod nga katawhan sa kampanya sa PDP, aktibo sab kaayo ang mga katawhan nga moabiba ni PRRD, bisan pa kon walay mga ayuda o mga minilyon nga mga proyekto nga ipangtanyag atol sa maong kalihukan.
○ ○ ○
Nisamot kini sa dihang gihimo ang matod pa ‘rendition’ ni PRRD ngadto sa The Hague tungod kay abtik kaayo nga gisikop sa kapulisan si PRRD ug gidali paglupad ngadto sa hukmanan sa ICC apan wala na hatagi sa higayon nga makakuha og ayuda gikan sa mga korte sa Pilipinas.
Daghan ang nagtuo nga dakong kwestiyonable ang gihimo sa kagamhanan ni BBM ngadto kang PRRD ug tungod niini, aduna nay dakong kalihukan dili lang dinhi sa Pilipinas kon dili hasta sa ubang lugar sa tibuok kalibotan.
Nahimong sentro sa maong mga kalihukan ang dakong kasuko ug kayugot sa mga katawhan sa gidangatan ni PRRD ug daghan kanila ang nanawagan nga iuli sa Pilipinas si PRRD.
Daghan sab ang nagtuo nga dakong sayop ang gihimo nga ‘rendition’ kang PRRD. Ngano man?
Tungod sa ilang gihimo kang PRRD, misamot kahumot si VP Inday Sara sa mga katawhan og daghan kanila ang nagplano nga ipakita ang ilang kaligutgot karong umaabot nga piniliay. Diretso sa inidoro, matod pa, ang mahitabo sa mga kandidato ubos sa Alyansa.
Matod pa sa usa ka iladong journalist karong bag-o lang, dunay paglaglag nga gihimo sa Alyansa batok kang Imee Marcos ug Camille Villar og makita nga sa mga kampanya nga gihimo, absent na ang duha. Kon tinuod man kini, basin og nakita nila ni Imee ug ni Camille nga mas maayo pa sa ilang kampanya nga maglahi ug dili na mokuyog sa grupo.
Adunay daghang epekto ang gihimong krusada karon alang sa kaluwasan ug hustisya ngadto ni PRRD ug aduna kini kalabotan sa kasamtangan nga impeachment batok kang VP Sara.
Matod pa sa pipila ka mga mayor ug gobernador nga nagpasilong karon ubos sa Alyansa nahadlok sila nga basin og madamay o maapil sila sa kasuko sa mga loyalista ni PRRD ug VP Sara og maentonses na hinuon ang ilang kandidatura. Gani, daghan kanila ang nisulti nga kon mahimo, dili lang sila mokumentaryo mahitungod sa isyu sa impeachment ug sa gihimong "rendition" ni PRRD.
Tak-om lang gyud mi ana nga mga topic kay hadlok mi og maapil sa kasuko sa katawhan, matod pa sa mga mayor. Matod pa, dili sab mahimo nga molahi o mosukwahi sila sa Alyansa kay maentonses man sab ang mga proyekto nga gisaad kanila, gawas pa sa mga gisaad nga mga ayuda panahon sa kampanya.
Pait ning among sitwasyon karon kay maigo gyud mi ani sa cross-fire, matod pa sa usa ka mayor.