Nagkadaiya lang ang buhaton sa mga napilde sa piniliay. Dunay uban nga maglisod pagdawat sa kapildihan tungod sa pagtuo nga kon mapilde gani, duna gyud nay tikas nga nahitabo.
Kon duna pay kuwarta nga nahibilin, mangita dayon og abogado unya ihatag sa abogado ang problema aron pangitaan og solusyon.
Bahala na ang abogado nga mosulbad sa problema basta matagad lang ang reklamo nga naumol sa hunahuna sa napilde.
Ang ubang abogado modawat lang gihapon bisan kon walay hayag nga kaugmaon ang kaso basta mobayad lang og husto.
Duna pud ubang abogado nga andam mogugol og panahon aron pasabton ang napilde nga lubog pa sa alkitran ang kadaugan sa maong kaso ug dawaton na lang ang kapildihan.
Wala magkinahanglan og kuwarta pero nasabtan kaayo sa abogado ang sitwasyon sa napilde ug dili na niya gusto dugangan ang kagastohan sa napilde.
Kadtong wala nay kuwarta, magbalikbalik na lang og yawyaw ngadto sa mga tawo nga andam maminaw sa iyang tagawtaw kay lisod man pud kon siya ra usa magyawyaw unya walay makadungog.
Maundang lang ang iyang “maoy” o balikbalik nga tagawtaw kon kapuyan na siya ug wala nay maminaw pa kaniya, labi na kon molikay na ang mga tawo nga moduol kaniya, apil ang iyang martir nga asawa.
○ ○ ○
Duna poy uban nga parehas sa mga gibuwagan sa uyab, modiretso dayon sa barbero ug magpatupi sa buhok, ang uban kay magpakalbo gyud.
Mao kini ang nahitabo sa usa ka kandidato pagka mayor nga nagtuo nga napilde na siya mao nga niadto sa iyang suki nga barbero ug nagpatupi na lang kay bug-at kaayo ang iyang dughan.
Maayo na lang kay giapas siya sa iyang mga kauban ug gisultian nga nidaog diay siya.
Kon tan-awon siya karon, hait kaayo tan-awon ang iyang bag-ong tupi nga matawag na karon og tupi sa kadaugan.
○ ○ ○
Ang uban, dili magtingog, dili mogawas sa ilang balay, maglublob lang permi ug magkalingaw og pangagho ug lawom.
Bug-at ug sakit kaayo paminawon ang mga napusgay nga mga pasalig gikan sa mga tawo nga gituhoan nga kasaligan ug katuhoan pero kusog ra diay mangopras sa mga sobre sa kinamangay.
Nausik lang diay ang mga linibo o minilyon nga nagasto sa kamangay kay wa man diay motuman sa sabot nga boto.
Unya kon mogawas sa balay, basin makita niya ang mga nagtraydor kaniya o makakita siya nga aduna nay bag-ong motor, sakyanan o appliances ang iyang mga gisaligan nga mobotar kaniya.
Aron paglikay niini, maayo pay magpuyo na lang sa balay kay basin mahinaykan pa hinuon ang mga hinampak.
○ ○ ○
Ang uban, labi na kadtong dunay mapinanggaon ug masinabtanon nga kapikas sa kinabuhi adunay simple kaayo nga buhaton - molarga lang sa gawas sa nasod aron maulian ang nasakitan nga kandidato nga bag-o lang nabiktima sa mga wala ug tuo nga mga pasalig.
Mahimo kaayo kini buhaton sa mga kandidato labi na kadtong mga nangopras sab sa mga hinatag nga mga kuwarta gikan sa mga partylist, mga senador, kongresman ug gobernador.
Sa politika kon dunay koprasay, duna sab gitawag og kupitay.
○ ○ ○
Ang uban, dali ra kaayo makadawat sa kamatuoran ug ang una dayon buhaton, ayuhon ug susihon og maayo kon asa dapita mosipyat ang ilang kampanya aron malikayan na kini sa sunod piniliay.
Pila ra gud pud nang 3 ka tuig, mokilab ra man na kon dili lang sigihon og hunahuna.
Bisan kon gitikasan sa mga leader, sa mga amigo ug mga dumadapig, makahimo lang gihapon sila og timbaya ug pakighinabi kanila nga sama sa wala lay nahitabo.
Dali ra kaayo sila maka-move-on kay nagtuo sila nga aduna silay espeso nga dugo sa politika ug ang kapakyasan apil na sa hugaw kaayo nga dula sa politika.