Daghan ang nanggawas nga mga komentaryo bahin sa bag-o lang nahuman nga Bohol Loop 2024 nga gisalmutan sa mga mahilig sa motorsiklo dili lang sa Bohol, kondili hangtod sa ubang silingan nga probinsiya.
Nindot ang maong katuyoan kay gihimo na man kini sa una ug ila lang gipadayon karong tuiga ug sobra sa 2,000 ang ningsalmot niini. Dakong puntos kini sa lokal nga turismo.
Apan giulan sa batikos ang maong kalihukan tungod sa disgrasya sa kadalanan atol sa Bohol Loop ug namatay gyod ang babaye nga nadasmagan.
○ ○ ○
Angay ba nga padayunon ang maong kalihukan?
Mao dayon kini ang dakong pangutana sanglit daghan ang gusto nga undangon ug daghan sab ang nagsulti nga padayunon.
Unsa man ang akong ikatampo bahin niini?
Una, kon wala lang untay disgrasya, wala ra man tingali moreklamo sa maong kalihukan. Buot ipasabot, niulan lang ang batikos tungod sa nahitabong disgrasya ug namatay ang biktima.
Ikaduha, dunay reklamo nga sama sa misaka sa utok ang rabies sa mga nagmotor kay hilabihan man nila nakapakusog nga sama sa naglumba sa kakusog ug nag-contest kon kinsay kinakusgan og tingog sa tambutso.
Mahimo ra man unta nga i-limit ang gikusgon sa dagan aron malingaw pod ang nanan-aw sa daplin sa karsada ug dili na kinhanglan nga magpakusog pa.
Ikatulo, dako ang gikatampo sa lokal nga turismo ang mga ning-apil nga gikan sa laing mga probinsiya.
Kon kwentahon ang kwarta nga ilang gigasto sa Bohol atol sa maong kalihukan, dako-dako sab kini ug daghang negosyo sa Bohol ang nangalipay sa natampo sa maong kalihukan sa ilang ginagmay nga negosyo.
Bisan kon katunga lang sa miapil, ibutang ta lang og 1,000 ang gikan sa gawas sa Bohol, dako gihapon kini kon kwentahon.
Pananglit, dihay pipila ka mga tag-iya og motorsiko ang akong nadungan og palimpiyo sa ilang mga motor sa usa ka car wash sa siyudad. Dili malalis nga nadungagan ang abot o kita sa maong car wash shop tungod sa Bohol Loop.
○ ○ ○
Kon duna may pagahimuon nga Bohol Loop sa sunod, angay batunan sa mga loopers ang disiplina samtang nagpadagan sila sa ilang mga motorsiklo.
Dili magpalabi og pakusog sa pagpadagan labi na kon naa sa sentro sa kalungsoran ug daghang mga tawo ang nanan-aw sa kilid sa karsada.
Ika-duha, angay mosunod sa patakaran sa trapiko samtang magpadagan, sama sa balaod nga kadtong hinay nga nagpadagan adto sa tuo nga bahin sa karsada, dili mo counter-flow ug magbantay sa mga blind curve ug dili kay magpataka lang og padagan, labi na kon dunay engkwentro.
Istriktuhon ang paghiling sa kondisyon sa motor ug sa driver sa dili pa sugdan ang kalihukan. Kadtong wala sa kondisyon, dili moapil, labi na gyod kon hubog pa o dunay gibati sa lawas ang drayber.
Angay hinumdoman nga malikayan ang disgrasya sa kadalanan kon mag-amping lang ang nagmaneho sa sakyanan.