Diputado: Bulilyaso

Cuentas Claras
Diputado
Diputado(File Photo)

Mao pa gani pagsugod, bulilyaso na man dayon.

Ang akong gipasabot mao ang giplano nga kausaban sa Batakang Balaod pinaagi sa people’s initiative.

Matod pa, dunay gihimo nga mga pagpangandam pinaagi sa pagsabwag og mga dokumento nga papirmahan sa mga tawo sa mga lainlaing lugar sa Pilipinas.

Dili na lang nato iapil ang batikos nga gipangbayran ang mga namirma aron mopirma sa maong mga dokumento.

Diretso na lang ta sa ilang gibuhat human mapirmahi ang mga dokumento.

Matod pa, gisumiter nila ngadto sa Comelec ang mga pirmado na nga mga dokumento.

Ang problema kay sama sa tartanilya, nag-una na man hinuon ang tartanilya kay sa kabayo, imbes guyoron ra sa kabayo ang tartanilya.

Ngano man?

Gisumiter nila ang mga pirmado na kunohay nga mga dokumento pero wala pa masumiter ang petition para people’s initiative.

Mao kini hinungdan nga miawhag si Atty. Romulo Macalintal nga dili na dawaton pa ang mga dokumento kay wala ra kini hinungdan ug nag-usik-usik lang kini sa panahon sa Comelec.

Human miangkon nga wala pay petition alang sa people’s initiative nga na-file sa Comelec, mitubag si Comelec Chairman George Garcia nga ilang gidawat kini tungod sa ilang trabaho nga ministerial lang.

Pero nidason siya nga kutob lang sila sa pagdawat niini.

○ ○ ○

Unsa man kahay mahitabo sa plano nga people’s initiative?

Sa pagkakaron, dili pa mahibaw-an. Kon hugot gyod ang bakos sa mga nagpaluyo sa people’s initiative, usa sa ilang mahimo mao ang pag-usab sa ilang stratehiya ug sundon nila ang gilatid sa balaod kabahin sa people’s initiative.

Angay nga makasabot sila nga dili mahimo ang short-cut kun pag-usab na sa Batakang Balaod ang hisgotan.

Kinahanglan nga moagi kini sa husto nga proseso.

○ ○ ○

Pero adunay baga nga dag-om nga sagubangon ang plano nga people’s initiative.

Ngano man?

Adunay giduso nga resolusyon ang Senado nga pag-usab sa tulo lang ka mga probisyon sa Batakang Balaod ug dili kini pinaagi sa people’s initiative.

Gani, ang plano sa Senado gidasunan man ni Speaker Martin Romualdez. Kon mao kini ang ratsada, klaro kaayo nga dako kini og tsansa nga molusot gyod.

Pero mao kini ang dakong pangutana – kon molusot gyod ang giplano sa Senado nga pag-usab sa Batakang Balaod pinaagi sa con-con o con-ass, mahimo ba nga i-limit ang pag-usab sa tulo lang ka mga probisyon sa Batakang Balaod ug wala nay lain?

○ ○ ○

Adunay survey nga gihimo karong bag-o, unsa man ang mas importante nga mga isyo karong panahuna?

Nigawas nga ang kamahal sa mga palaliton ang nag-una ug ang iwit o dili importante nga isyo mao ang pag-usab sa Batakang Balaod.

Nagpasabot lang kini nga walay interes ang katawhan sa plano nga pag-usab sa Batakang Balaod kay mas importante kanila ang ilang inadlaw nga mga panginahanglan, ilabi na kadtong grupo sa gitawag og kabos o timawa sa katilingban ug kadto lang wala magkalisod sa ilang panginabuhi ang naghuna-huna o nagplano sa pag-usab sa Batakang Balaod.

Praktikal kini nga panghuna-huna, ilabi na kanila nga kanunay nag-atubang sa problema kon unsa ang sunod nga idalit sa lamesa matag adlaw.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph