Sukad pa gahapon hangtod karon, Miyerkules, nagpusotpusot lang ang mga pangutana mahitungod sa kahimtang ni PRRD human kini giditini sa kapulisan ug unsay mahitabo sa nasod human dakpa si PRRD gikan sa iyang byahe sa Hong Kong kauban ang mga kandidato pagka senador sa PDP-Laban.
Lisod tubagon ang mga pangutana sanglit sila mismo nga mga sinaligan ni PRRD didto sa Manila sama sa nakalitan sa panghitabo ug sa pagkakaron nangita pa sa katin-awan bahin niini.
Matod pa sa balita, nakadawat kuno ang PNP og arrest warrant gikan sa International Criminal Court (ICC) ug mao kini ang gibasehan sa pagdakop ug pagditini ni PRRD.
Wala mag-usik og panahon si PRRD pagpangutana og unsay kaso batok kaniya ug unsay gibasehan sa warrant nga gi-isyu sa ICC.
○ ○ ○
Lisod sabton kining gihimo sa administrasyon ni BBM.
Kon kahinumdoman, dili na sakop ang Pilipinas sa ICC ug tungod niini, walay obligasyon ang nasod pagtuman sa mga mando sa ICC. Sa amigo pa si BBM ug si VP Sara Duterte, isog kaayo nga nipadayag si BBM nga dili mokuoperar sa ICC sa pagabuhaton nga imbestigasyon kalabot sa reklamo nga extrajudicial killings batok kang PRRD. Apan sa dihang nagkaaway na sila, nikalit man lang og kambyo si BBM ug nisulti nga andam na nga mosunod sa mando sa ICC. Pamolitika ba kini?
Kon kahinumdoman sab, adunay warrant of arrest nga gipagawas ang ICC batok kang Israel Prime Minister Benjamin Netanyahu ug sa iyang kalihim sa depensa kanhi. Apan wala kini bili sanglit hangtod karon wala may nangahas pagdakop kang Netanyahu ug sa iyang kalihim. Sama sa Pilipinas, dili sakop sa ICC ang nasod sa Israel. Nganong nahimo man sa Pilipinas ang pagdakop sa kanhi presidente apan wala mahimo ang pagdakop kang Netanyahu?
Kon kahinumdoman sab, nipagawas og executive order si President Donald Trump sa Estados Unidos nga nag-sanction sa ICC, ingon man sa mga opisyales nga naghimo sa imbestigasyon batok sa mga katawhan sa Estados Unidos ug sa mga kaalyados niini sama sa Israel nga naglakip sa “economic ang travel sanctions.” Sanglit kaalyado man sa Estados Unidos ang Pilipinas, klaro kaayo nga naapil kini sa mando ni Trump. Apan bisan pa niini, nakakita lang gihapon og kaisog si BBM nga supakon ang mando ug kagustohan ni Trump.
Ang pangutana - dili ba kaha kini makaapekto sa relasyon ni BBM ngadto ni Trump, ilabi na kay gibalita ang gihimong paningkamot ni BBM nga makakuha og “appointment” ni Trump didto sa Estados Unidos?
○ ○ ○
Dunay mga pangutana.
Ang mga katawhang Pilipinhon, dili ang ICC, ang nipili ni PRRD nga mamahimong presidente. Tungod niini, dili ba husto nga ang gigikanan sa gahom sa pagmando - ang katawhang Pilipino - ang angay nga mohukom kon angayan ba nga pasakaan sa kaso si PRRD kalabot sa gitawag og extrajudicial killings nga nahitabo atol sa iyang pagka presidente? Kinsa may naghatag og katungod sa ICC nga mokaso ug mopadakop sa usa ka piniling lider sa nasod nga Pilipinhon? Nagpasabot ba kini nga mas gamhanan pa ang ICC kay sa hiniusang gahom sa mga katawhang Pilipinhon?
Kon ang mga reklamo batok kang PRRD may kalabotan sa mga nangamatay atol sa kampanya sa druga dinhi sa Pilipinas, nganong ang ICC man ang mokaso ug nganong dili man ang mga korte sa Pilipinas ang mokaso ug mohukom niini?
Gisunod ug girespetohan ba sa ICC ang mga tawhanong katungod ni PRRD sa wala pa mopagawas og arrest warrant?
Tungod sa gihimo ni BBM nga pagsunod ug pagtuman sa mando sa ICC, mahimo na nga buhaton karon sa ICC ang pagpadakop ni bisan kinsa nga ilang hukman nga sad-an, apil na si BBM?
○ ○ ○
Daghan ang nagpaabot.
Unsay gipaabot?
Nagpaabot lang og “mando” nga mopakita sa ilang suporta ni PRRD pinaagi sa prayer rally ug uban pa. Ang uban, naghisgot na ug posible nga kagubot tungod sa ilang kadismaya sa mga lihok ni BBM batok kang PRRD ug ni VP Inday Sara.
Unsa kahay moresulta niining tanan?