Wa magpanuko pagpadayag si VP Sara Duterte sa iyang gibati nga kahiubos sa mga mitraydor kaniya pinaagi sa pagpirma sa impeachment complaint didto sa House of Representatives sa dihang mi-atender siya sa usa ka political rally didto sa Tagbilaran kaniadtong Lunes. Matod pa niya, walay bisan usa sa iyang mga anak nga adunay ninong o ninang nga politiko. Ngano man? Tungod kay dili kuno mahibaw-an kon kanus-a siya traydoran sa mga ninong o ninang sa iyang mga anak. Sa mga naka-dungog, daghan ang miuyon sa iyang gisulti.
○ ○ ○
Matod pa niya, daghan ang misulti kaniya nga napugos lang sila sa pagpirma tungod kay wala silay kwarta. Gi-komentaryohan kini ni Inday Sara - sus, wala na gani kay kwarta, wa pa gyod kay prinsipyo. Ageh. Hugyaw na sab ang mga tawo sa ilang nadungog.
Migawas sa mga balita nga gi-endorso kuno ni Inday Sara ang pipila ka mga politiko nga kontra karon sa kasamtangan nga namunoan sa probinsiya sama sa kandidato pagka-gobernador, pagka-kongresista sa 3 ka distrito, apil na ang pipila ka mga opisyales. Buot ipasabot, gusto ni Inday Sara nga suportahan sa mga katawhan sa Bohol ang mga mi-kontra sa kasamtangan nga namunoan sa Bohol karon. Sa akong nahibaw-an, nabahin ang hunahuna sa mga katawhan niini. Adunay miuyon sa iyang sugyot, aduna usab wa mahiuyon. Nanghilak gani ang uban sa ilang kahisagmuyo. Ngano man? Wa sila magtuo nga kadtong mga klaseha sa politiko ang suportahan ni Inday Sara.
○ ○ ○
Buyno, dili sab mahimo nga suportahan o paluyohan ni Inday Sara ang kasamtangan nga namunoan sa probinsiya karon sa gobernador, mga kongresista ug pipila ka mga mayor sanglit didto man sila mipaluyo sa kaatbang nga grupo sa Alyansa ni BBM ug ni House Speaker Martin Romualdez. Kahinumdoman sab nga ang 3 ka mga kongresista sa Bohol mipirma sa impeachment complaint batok ni Inday Sara ug ang duha kanila mga kumare pa gyod ni Inday Sara. Mao tingali kini ang hinungdan nga napugos si Inday Sara paghisgot sa pagtraydor nga nahitabo batok kaniya.
○ ○ ○
Apan daghan sab ang natingala. Ngano kaha nga nag-apil-apil pa man si Inday Sara sa kampanya sa mga kandidato sa lokal nga angay man unta nga mo-focus lang si Inday Sara sa kampanya sa mga senador sanglit importante man kaayo ang resulta niini kon hisgotan ang umaabot nga impeachment trial sa senado? Ang 12 ka mga senador nga modaog sa piniliay sa Mayo 12 mo-apil sa laing 12 pa ka mga senador nga maoy mohukom kon angay ba gyod nga tangtangon sa pangatungdanan si Inday Sara. Sumala sa balaod, 2/3 nga boto sa 24 ka mga senador ang gikinahanglan aron mapalagpot sa katungdanan si Inday Sara. Tungod niini, nagkinahanglan si Inday Sara sa suporta sa dili momenos 9 ka mga senador aron mapukan ang kiha batok kaniya. Anhi dinhi makita kon unsa ka importante nga maayohon ang kampanya sa mga senador sa PDP aron makuha ang dili momenos 9 ka mga boto gikan sa mga senador. Ngano kaha nga naghago pa man si Inday Sara sa kampanya sa lokal nga mga kandidato nga mas gikinahanglan man siya sa kampanya sa mga senador?
○ ○ ○
Akong nahibaw-an nga daghan sa mga katawhan sa Bohol ang nagplano nga mobotar sa tanang mga PDP senatoriables tungod ni Inday Sara apan mohimo sa ilang kaugalingon nga desisyon alang sa mga lokal nga mga kandidato. Amen.
○ ○ ○
Dili ba kaha mas maayo nga ang igasto sa kagamhanang lokal ug nasyonal alang sa subsidized nga 20-peso per kilo nga bugas humay adto na lang igugol sa pag-ugmad sa atong agrikultura aron aduna na kitay kaugalingon nga patigayon sa pagkaon ug dili na magsalig sa importasyon sa bugas gikan sa ubang mga nasod? Ngano pod kaha nga karon ra man nga padung na ang piniliay kini gihimo ni BBM ug wala niya kini himoa sa miaging tuig o kaha, niadtong panahon nga siya ang milingkod nga Kalihim sa Department og Agriculture? Gawas sa problema sa kanihit sa atong panalapi, padayon nga problema sa korapsiyon ug uban pa, unsa may mahitabo sa atong nasod kon wala na o limitado na lang ang atong mapalit nga bugas gikan sa gawas? Dili ba klaro kaayo nga kining subsidized 20-kilo rice program ni BBM usa ka dakong kapakyasan sa iyang programa sa pag-ugmad sa atong pagkaon sanglit magsalig na man lang kita sa uban ug dili na magtanom sa atong kaugalingon nga pagkaon? Angay ba nga ipanghinambog kini?