Sa miaging adlaw, nagubot ang mga motorista duol sa Chocolate Hills tungod sa nahitabo nga disgrasya sa kadalanan, nagbuy-od ang drayber sa motorsiklo ug nagkadugo ang lawas.
Samtang ang motosiklo nisuksok sa ilawom sa awto.
Matod pa sa nakakita, padung moliko ang awto padung sa wala samtang nagsubay sa national highway pero nipadayon lang gihapon og overtake ang nag-motorsiklo bisan og mahimo ra unta nga mopahinay ug hulaton nga makatiwas og liko ang awto.
Tungod kay kusog ang pagpadagan sa nag-motor, plus wa gyod niya hunahunaa nga delikado ang iyang gibuhat, nahitabo ang disgrasya.
○ ○ ○
Daghan ang nipadayag sa ilang kaluoy tungod sa panghitabo, naangol ang nagmotor ug naguba ang awto ug motorsiklo.
Kalit kaayo ang panghitabo ug sakit hunahunaon nga daghan ang naangin sa nahitabong aksidente.
Pero diha say miingon nga “mirisi.”
Nganong mirisi man?
Tungod kay ilang nakita ang kasagaran nga buhat sa mga nag-motorsiklo nga mo-overtake wala o tuo nga base sa balaod, anha ra man unta sa tuo ang mo-overtake.
Tungod kay ilang nakita nga sama sa gibale-wala na sa mga nag-motorsiklo ang balaod sa trapiko tungod kay sama sa gusto nila nga moabot og dali sa ilang adtoan maoy hinungdan nga nagpakusog sila og padagan.
○ ○ ○
Daghan sa mga nag-motor ang motuyo gyod og patunga sa dalan samtang magpadagan. Kon dunay mga nag-awto nga mobosina kay gusto mo-overtake, masuko pa ug ipagawas dayon ang kamot dayon pakita sa ilang “middle finger.”
Nakalimot sila sa balaod sa trapiko nga kadtong hinay ang padagan, adto gyod sa tuo nga bahin sa karsada kay kadtong kusog o paspas ang padagan, adto sab sa wala nga bahin sa ilang linya.
Kasagaran sab sa mga nag-motor ganahan kaayo nga mo-counterflow nga bisag naglinya ang mga sakyanan kay naghulat og “go” signal, molusot lang gihapon sa kilid ug molapas na sa yellow line nga naa sa tunga sa karsada.
Wala nila hunahunaa nga ang yellow o white line sa tunga sa karsada maoy ilhanan sa pagbahin sa karsada sa duha ka linya sa trapiko ug dili na sila angay pa nga molapas sa linya kay agianan na kini sa pikas.
Bisan gidili ug delikado kini, mo-insister lang gihapon ang mga nag-motorsiklo nga mo-counterflow.
Pagkagahiaa lagi’g puno-puno.
○ ○ ○
Unya ra ba kon dunay taga Land Transportation Office (LTO) nga maghimo og checkpoint, ang mga nag-motor maoy kusog kaayong moreklamo ug maoy kusog kaayo motago.
Ngano man?
Kay una, kasagaran kanila mga walay lisensiya aron maka-drive og sakyanan.
Kasagaran kanila, nagpadagan nga walay rehistro ang ilang sakyanan.
Kasagaran kanila nagpadagan nga kulang ang importanteng mga himan sa sakyanan sama sa helmet ug uban pa.
Tiaw ba – kusog kaayo mopadagan unya wala man diay toy lisensiya o wala man diay rehistro ang sakyanan?
○ ○ ○
Mobalik ta sa disgrasya sa unahan, unsay reaksiyon sa tag-iya sa awto?
Hilabihan niyang pamalikas kay matod pa niya, mona-mona niyang amping sa pagmaniho kay dili siya gusto nga madisgrasya pero nadisgrasya lang gihapon tungod sa pagka-iresponsable ug pagka-gahi og ulo sa nag-motorsiklo.
Nadaut pa akong sakyanan, nalangan pa iyang mga lakaw unya makagasto pa gyod kuno siya og ahat o wala sa hustong panahon tungod lang sa gihimo sa nag-motor.
Pagkaluoya.