Makalingaw gyud ning politika, labi na panahon sa piniliay. Pananglit, dihay usa ka dakong opisyal sa usa ka ahensiya sa gobiyerno nga bag-o pa lang ni-retire.
Sanglit wala na man sa serbisyo, niagi siya sa panahon nga mag-adjust pa siya sa iyang bag-ong sitwasyon nga wala na siyay trabaho, magkalingaw na lang siya og suroy-suroy, hatod-kuha sa iyang asawa matag adlaw ug aduna na siyay panahon nga malingaw sa iyang mga apo.
Nakigkita kaniya ang gobernador ug gitanyag kaniya ang posisyon pagkamayor sa lungsod.
Sanglit dugay man siya nga wala makit-i sa maong lugar gawas pa nga lig-on sab nga ikaatbang ang kasamtangan nga mayor, deretso siya nga nibalibad.
Apan maayo kaayo mokumbinsir ang gobernador labi na ang pagsulti nga sayang ang iyang dakong kahibalo ug kasinatian nga dili na mapahimuslan sa mga katawhan, gawas pa sa pagpasalig nga ang gobernador na ang mahibalo sa kagastohan sa piniliay.
Ayaw ra kaguol sa gasto, akoy bahala ana kay tagaan ka nako og kwarta aron segurado ka nga mahimong mayor, maoy pasalig sa gobernador.
Bisan pa sa hugot nga pagsupak sa asawa ug mga anak, wa gyud kini makapabugnaw sa nag-alintabo nga pangandoy sa bag-ong ni-retire nga mamahimong sunod nga mayor sa maong lungsod.
Tuod man, nisugot ang retiree ug nikandidato gyud siya pagkamayor.
Sa sinugdanan, hinay-hinay pa ang iyang pagpagawas sa iyang kuwarta nga nakuha isip retirement benefits pero sa ngadto-ngadto, nagkadako ug nagkanunay na kini og gasto sa iyang nadawat sa gobiyerno.
Pipila ka adlaw gikan sa piniliay, nahurot na ang iyang tinigom pero malipayon lang gihapon siya tungod kay gipasaligan na man siya nga hayag na ang iyang kadaugan.
Ang iya na lang buhaton sumala sa iyang mga leader, nga segurohon nga makahimo siya og special ops pinaagi sa pagpanghatag sa gitawag og hiphip o uwan-uwan base sa resulta sa iyang straw votes.
Tungod sa pasalig sa gobernador nga siya ang mohatag sa kagastuhan sa kampanya, tulin pas manatad nga niadto ang retiree sa balay sa gobernador.
Taudtaod pud ang iyang paghulat pero wala magsapayan ang retiree total apil man kini sa sakripisyo aron mahimong sunod nga mayor.
Paggawas sa gobernador, wala nay lipudlipod pa ang retiree nga nisulti nga nianha sila aron kuhaon ang gisaad sa gobernador nga ayuda sa kampanya. Usa lang ang gitubag sa gobernador - asa man imong titulo?
Dili diay mogawas ang ayuda sa gobernador kon walay bugti nga titulo sa yuta gikan sa retiree. Huyhoy ang abaga sa retiree nga nipauli nga walay nadala nga ayuda.
Tuod man, hilabihang pildiha ang retiree ug nahurot pa gyud ang iyang tinigom nga gikan sa iyang retirement benefits.
Napildi na, napurdoy pa gyud, plus gitabangan pa gyud siya og pagmahay sa iyang asawa ug mga anak.
○ ○ ○
Dihay mayor nga utokan. Pipila ka adlaw gikan sa piniliay, nag-drama ang mayor ug supporters niini. Ilang gipalabas nga gipadakop kunohay ang usa ka supporter nga nakit-an pinaagi sa video nga nidawat sa envelope atol sa special ops.
Gipagawas sa facebook ang maong video ug gipahibalo ang mga katawhan nga adunay tawo sa mayor nga nasakpan nga namalit og boto.
Dali ra nga nag-viral ang maong video ug dali ra kaayo nikatap ang balita nga tungod sa maong hitabo, dako kaayo ang posibilidad nga dili na manghatag pa og uwan-uwan ang kampo sa mayor.
Mao sab kini ang mensahe nga nakuha ug nasabtan sa kampo sa kaatbang nga grupo. Ang ilang desisyon, kay dili na man manghatag og uwan-uwan ang kampo sa mayor, dili na lang pud sila manghatag sa ilang giandam nga uwan-uwan.
Wala sila masayod nga hilom ug sekreto ra man diay nga nanghatag ug uwan-uwan ang kampo sa mayor kay kadtong tanan, drama sa mailad ra man diay.
Nagmata lang diay og morning ang kaatbang.
Pag-ihap pas boto pagkagabii, hilabihang pildiha ang kaatbang nga wala na manghatag og ayuda.
Samtang naghinuktok ang napilde, hilabihang biboha ang kampo sa mayor nga naghinugilon sa ilang malampusong drama.