Diputado: Duna bay silot kon mosipyat?

Gilibkas na sa Ombudsman ang preventive suspension order nga gipahamtang batok kanila ni Bohol Governor Aris Aumentado, pipila ka mga mayor, mga barangay kapitan ug pipila ka mga opisyal sa gobiyerno kalabot sa kontrobersiya nga pagkatukod sa Captain’s Peak Resort sa Sagbayan, Bohol.

Buot ipasabot, mibalik na sa ilang tagsa-tagsa ka mga katungdanan ang nahisgutan nga mga opisyal tungod kay Hulyo 31, 2024 man ang petsa nga gitakda sa paglibkas.

Bisan milanat og sobra sa usa ka bulan ang pagkasuspenso, daghan ang nagtuo nga malibkas gyod kini kay sama sa sitwasyon ni Gob. Aris, natukod ang Captain’s Peak Resort sa panahon nga dili pa siya ang gobernador sa maong probinsiya ug klaro kaayo nga wala gyod siyay kalabutan sa pagkatukod niini.

Mao usab kini ang nahitabo sa ubang mga opisyal nga naapil sa pagka-suspenso.

Tungod niini, daghan ang natingala kon unsa man gyod kaha ang proseso nga gisunod sa Ombudsman sa pagpagawas og preventive suspension.

Dili ba diay tun-an usa nila og maayo ang reklamo, apil na ang mga naka-lista nga mga kunohay naapil sa maong reklamo, usa pa nila ipagawas ang maong order?

Tiaw bay usa ka bulan kapin nga walay trabaho, walay sweldo ug dili masukod nga kaulaw, tungod sa pagpahamtang sa maong order, unya gilibkas ra man pod diay kay walay klaro nga kapasikaran.

Dili lalim, ug dili sayon, sa tanang naapil sa maong preventive suspension kay gawas nga walay trabaho ug walay sweldo, kinahanglan pa sila nga mogasto alang sa ilang abogado nga maoy modepensa sa maong reklamo.

Kon mosipyat ang ordinaryong empleyado sa ilang trabaho, pahamtangan dayon og reklamo ug dako na dayon og kausaban ang kinabuhi sa maong tawo.

Pero kon masipyat ang Ombudsman sa ilang trabaho, aduna bay susama nga “silot” nga ipahamtang kanila?

○ ○ ○

Tungod sa maong preventive suspension, daghan nga mga empleyado ang naapektuhan labi na kadtong mga JO o mga casual nga co-terminus sa nagtudlo kanila.

Labi na gyod kay ang ipuli nga acting governor ug acting vice governor panahon sa preventive suspension dili parehas og partido.

Matod pa, diha na untay plano nga pangtangtangon ang pipila ka mga empleyado nga dili kaalyado sa maong mga opisyal, nga nakapaguol kaayo sa mga apektadong empleyado kay tiaw ba og makulban ka og kaldero.

Maayo na lang kay gilibkas ang preventive suspension, nakabalik si Gov. Aris og mi-resulta kini nga parehas na og partido ang gobernador ug bise gobernador.

Saved by the bell, matod pa.

Tungod niini, daghan ang nagplano nga mobalos sa naasoy nga opisyal panahon sa piniliay sunod tuig.

○ ○ ○

Tungod kay nabalik na man sa katungdanan si Gov. Aris, mibalik na sab dayon ang kalagsik sa iyang mga kaalyado sa politika ug human sa ilang meeting kaniadtong Dominggo, nasabotan dayon ang kompleto nga linya gikan sa gobernador, bise gobernador ug mga bokal sa tulo ka mga distrito.

Nasabutan usab nga ang ka-tandem ni Gov Aris sa piniliay sa sunod tuig mao si city Kagawad Nick Besas, nga amahan usab sa kongresista sa Tersero Distrito nga si Rep. Alexie Besas-Tutor.

Tungod sa maong kasabutan, misamot kalig-on ang panagtambayayong sa grupo ni Aumentado ug ni Tutor, labi na kay asawa usab ni Aumentado ang kongresista sa Segundo Distrito nga si Kong. Vanvan Aumentado.

Kon imong tapuon ang mga lungsod sa 2nd ug 3rd district sa Bohol, mokabat na kini sa 33 ka mga lungsod sa total nga 47 ka mga lungsod ug 1 ka siyudad sa tibuok Bohol.

Mao kini usa sa mga hinungdan kon ngano nga daghan ang nagtuo nga lig-on na kaayo ang grupo nila ni Aumentado ug Tutor ug maglisod gyod ang ilang kakontra sa piniliay sunod tuig.

○ ○ ○

Natapok gyod ang mga gobernador sa pipila ka mga rehiyon sa Visayas atol sa kasaulogan sa 455th anniversary sa Probinsiya sa Sugbo diin si First Lady Liza Araneta-Marcos mao ang pinasidunggan nga bisita.

Tungod kay nagkatapok man ang mga politiko, samtang nagkaduol ang piniliay sunod tuig, daghan ang nagtuo nga usa sa mga nahisgutan sa maong kalihukan mao ang isyo sa politika, labi na gyod kay gideklarar ni Gov Gwen Garcia nga ang One Cebu hugot nga mosuporta sa pamunoan ni Presidente Bongbong Marcos (PBBM).

Tungod niini, madayon kaha ang hugon-hugon nga molansad pagka-senador si Gov Gwen Garcia ubos sa admin party?

Kon mahitabo kini, madayon ba kaha ang hugonhugon nga molansad si Kong PJ Garcia isip gobernador sa Sugbo?

Kon mahitabo kini, kinsa man kaha ang maka-tandem ni Kong PJ?