Kaniadtong panahon sa akong kabatan-on, adunay paagi ang akong mga barkada aron sugdan ang sumbagay.
Unsaon man?
Ang usa ka grupo, maoy motulod sa usa ug ang pikas grupo mao sab ang motulod sa pikas aron mag-abot ang ilang masig ka lawas, ang tuyo niini mao nga painiton ang duha aron magsugod dayon ang sumbagay.
Kon dili kini moepekto, gunitan dayon ang kamot sa gi-manok sa grupo dayon isumbag kini sa pikas ug himoon sab kini sa pikas grupo hangtod masakitan ang mga gi-manok og magsumbagay na dayon.
Nganong naghisgot man ko og ingon ini?
Tungod sa nahitabo sa duha ka barko sa atong Coast Guard nga matod pa, gibanggaan sa laing duha ka barko sa China. Ambot og kinsay nagsulti sa tinuod, adunay lainlaing bersiyon ang Pilipinas ug ang China.
Pero sa atong nakita sa balita, dako ang kadaot nga niresulta sa mga barko sa Coast Guard sa Pilipinas.
Kon imong tan-awon, sama kini sa sinugdanan sa sumbagay kaniadto.
Tulodtulod, dayon giyahan ang sumbag hangtod nga magsumbagay na lang gyod nga ila nang kaugalingon nga kabubut-on.
Sa unang mga panahon, babag-babagan lang ang mga barko sa Coast Guard, dayon misunod ang pag-paulan sa tubig ug pusilon pinaagi sa hayag kaayo nga suga, hangtod nga misunod na nga banggaan na gyod ang mga barko sa Pilipinas.
Ang pangutana - mahinog ba kini ngadto sa kagubot pinaagi sa pag-gamit sa armas ug bala sa tinuod na gyod nga giyera?
○ ○ ○
Unsay plano nga buhaton sa Pilipinas tungod niini?
Sa pagka-karon, wala pa kita masayod og unsa gyod ang buhaton o kaha, pasagdan na lang kini og wala ray buhaton.
Pero klaro kaayo nga gipakita na gyod sa China nga andam kini mogamit sa mga himan sa gubat aron lang mapatuman ang iyang gituhoan nga katungod sa maong mga lugar, nga gi-angkon sab sa Pilipinas.
Ang nakanindot lang sa China kay aduna kini klaro nga kapasidad nga mohimo sa iyang gipanulti samtang ang Pilipinas igo lang sa pagsulti ug wala sa buhat.
Mao kini giingon kaniadto ni kanhi Presidente RRD (Rodrigo Roa Duterte) nga walay ikasukol ang Pilipinas sa China kon magka-gubot gyod ang duha ka nasod. Midugang pa siya nga dili siya mosugot nga isugnod sa kaalautan ang mga sundalo nga Pinoy sa usa ka gubat nga seguradong pildi ang nasod Pilipinhon.
Niadtong panahona, nagtuo si PRRD nga dili molaban ang US sa Pilipinas kon mahitabo gayod ang kagubot og kon mahitabo man kini, bugtong ang Pilipinas lang ang manalipod sa iyang kaugalingon.
Matod pa, mao kini ang usa sa mga hinungdan ngano nga gi-amigo na lang kaysa gi-kontra sa Pilipinas ang China niadtong panahona.
Pangutana - aduna bay nausab sa sitwasyon sa nasod nga sarang ka-basehan nga lig-on na kini nga makig-away sa China?
○ ○ ○
Hilabihan ka busy ang mga politiko karon.
Lima singko nga nang-gawas ang mga tarpaulin nga nagpakita sa pangalan, hulagway og greetings kunohay sa mga politiko sa mga lain-laing lugar. Mora kunohay og kinasingkasing ang ilang greetings sa mga katawhan sa maong lugar.
Pero kon imong hunahunaon, karon lang kini sila mohimo niini nga padung na ang piniliay og wala nila kini buhata sa miaging tuig nga layo pa ang piniliay.
Tungod niini, klaro kaayo ang katuyoan sa maong pagpakatap sa mga tarpaulin - namolitika na ang maong mga politiko bisan kon wala pa kini itugot. Nagsalig lang kini sila nga dili pa sila makasohan og kalapasan sa Omnibus Election Code nga premature campaigning kay kon imong tan-awon, dili pa man sila mga kandidato kay wala pa man sila ka-file og COC sa Comelec.
Pero kon tutokan nimo og maayo ang maong isyo, moryo-moryo lang ang ilang mga greetings ug namolitika lang sila.
Ang resulta - gawas nga gibakakan nila ang mga katawhan sa ilang tinuod nga katuyoan, naghugaw-hugaw lang kini sa kalikopan ug nakadugang pa kini sa mga sagbot nga maoy nakaingon nga dali ra kaayo nga mobaha bisan dali ra kaayo ang pag-agas sa ulan.
Nindot unta kon dili kini itugot kay klaro lang kini nga pangilad sa katawhan, hugaw-hugaw sa kalikopan ug nindot unta nga kon pasagdan man lang gani kini sila nga momantala sa ilang mga tarpaulin, mobayad unta sila sa kada tarpaulin nga ilang ibutang isip environmental fee sa maong lugar.
Kon pabayron kini sila og environmental fee, atong tan-awon og mobutang pa ba gihapon ang mga hinampak nga mga politiko sa ilang mga gipahimo nga mga tarpaulin.