Napulo ug lima na ka tuig ang nakalabay human mohapak si ‘Ondoy’ sa nasod ug mibanaw ang baha sa mga lugar nga gipahimungtan sa maong bagyo.
Hilabihan ang kadaot nga gihimo ni Ondoy og nindot kaayo paminawon ang mga leksiyon nga nakat-onan ingon man ang giplano nga buhaton sa mga namunoan sa nasod niadtong panahona aron malikayan nga mahitabo pag-usab ang maong katalagman.
Akong usbon, napulo ug lima na ka tuig ang nakalabay. Sulod sa maong gidugayon, unsa kahay nahitabo sa mga leksiyon nga nakat-onan, ingon man ang mga giplano nga buhaton aron dili na mausab pa ang maong katalagman nga mugna ni Ondoy?
Tuod man, mihapak si bagyong Carina sa nasod ug unsay nahitabo?
Nahimong kataw-anan, pero hilabihan ka sakit, ang nahitabo tungod kay napamatud-an pag-usab nga igo ra sa plano ug wala diay nahimo ang gipangyawyaw sa atong mga lideris sa nasod.
Nawagtang lang ang budget, bisan kon nasayod ang katawhan kon asa padulong, unya karong panahona, sama sa plakang guba nga gibalik na sab sa atong mga lideris ang ilang plano nga himuon unya pakapinan pa gyod og awas-awas nga pangatarongan nga laing mga butang ang nakaingon sa maong katalagman ug dili ang ilang palpak nga gibuhat.
Komedya ba god nang bilyon-bilyon nga budget ang gigasto kunohay pero palpak lang gihapon.
Ang kataw-anan kay basora lang gihapon ang pasanginlan nga maoy usa sa nakaingon sa pagbaha.
Susmariyosep, kon hiposon lang unta ang basora sa tukmang panahon og dili pasagdan nga magtambay sa bisan asa lang nga lugar hangtod ibanlas kini sa baha o kaha, silotan sa hustong silot ang dili mosunod sa patakaran sa paghipos sa basora, dili gyod unta problema ang basora.
Pero bisan pa man sa maong mabaw nga palusot, sa kadugay sa panahon nga milabay human mihapak si Ondoy, apil na ang matod pa 1 ka bilyon ka pesos nga budget matag adlaw para sa baha, basora lang gihapon ang pasanginlan?
○ ○ ○
Karon nga padung na man pod piniliay, diin magpili na sab kita sa molingkod sa laing 3 ka tuig, maayo unta og mahinumdoman nato ang gipangsaad, apil na ang misaad apan wala motuman, sa panahon nga mosulat na kita sa balota.
Maayo unta nga leksiyonon nato ang mga kandidato nga kusog lang mosaad apan dili motuman ug atong pilion kadtong mobuhat gyod sa ilang gisaad.
○ ○ ○
Karon nga padung na ang piniliay, nagbaha na sab ang survey-survey. Dunay survey nga moryo-moryo, duna poy survey nga binayran.
Buyno, duna pod survey nga katohoan.
Makita sa maong mga survey kon kinsa sa mga kandidato ang nag-una konohay ug dunay dakong puruhan nga modaog kon himoon ang piniliay.
Sa mga tawo nga dali ra pod matonto, malipay sila kon ilang makita nga nag-una kunohay ang ilang kandidato pero magool kon iwit ang ilang kandidato.
Nindot unta kon disiplinahon sa Comelec ang mga tawo nga kusog manunto sa mga katawhan pinaagi sa pagpakatap sa peke nga survey.
Maayo unta kon mohatag og patakaran ang Comelec sa proseso sa survey ingon man ang pag-accredit sa mga grupo nga mao ray tugyanan sa survey ug dili kay si bisan kinsa lang.
Kay alang kanako, apil kini sa obligasyon sa Comelec nga buhaton ang angay buhaton alang sa usa ka malinawon, hapsay ug katuhoan nga piniliay.
○ ○ ○
Nahimong bisita sa pamilyang Balite si Bise Presidente Inday Sara Duterte-Carpio sa panahon sa pagtutaw sa mitaliwan na nga Bise Gobernador sa Bohol nga si Vice Gov. Victor Balite sa miaging semana.
Kalma lang kaayo nga midawat si Inday Sara sa “biay-biay” nga dili mopaduol kaniya ang mga lokal nga mga lideris kay mahadlok og ma-suspend sa trabaho.
Gani dihay usa ka opisyal nga gusto unta magpakuha og hulagway kauban si Inday Sara ug iyang gipangutana kon okay ra ba siya nga magpa-picture kay basin og maapil sa suspension, dayon katawa.
Wala matarog ang lider og nagpahulagway gyod.
Human sa maong hulagway, miingon siya ni Inday Sara nga wala koy gikahadlokan Mam Inday kay last term na man pod nako ug nangatawa silang duha.
Ngano kaha nga naisyo man ang suspension kon maghisgot na ni Inday Sara o kauban o kaalyado ni Inday Sara?
Gihimo na ba nga instrumento sa pamolitika ang preventive suspension?
Ngutana lang.