Daghang nalingaw sa gihimong SONA sa presidente, labi na gyud kadtong naghisgot siya og bahin sa pagpakaulaw sa mga nangurakot sa panudlanan sa gobiyerno.
Matod pa sa akong amigo, wala na ko motiwas og paminaw oy, giluod kong naminaw. Wala na siya mopasabot kon unsay gipasabot sa iyang gisulti nga giluod siya - sa nagsulti ba o sa iyang gisulti.
○ ○ ○
Kinsa may gipasabot sa presidente sa iyang giingon nga angay sila maulaw kay nangurakot? Tubag - ang mga kurakot. Ingon pud ang akong amigo - kon nasayod man gani ang presidente bahin sa pangurakot, unsa may angay niya buhaton, sakto ra ba nang maghisgot lang siya og kaulaw, dili ba diay angay nga kasohan sila sumala sa balaod?
Gitahasan niya ang DPWH sa paghatag sa lista sa mga proyekto bahin sa flood control sa tibuok nasod. Ang maong lista maoy himuong basehan sa imbestigasyon nga pagahimuon.
Sus, kinsa kaha ang maghimo sa imbestigasyon ug kanus-a pa kaha mogawas ang resulta sa maong imbestigasyon.
○ ○ ○
Kon nakita pa lang sa presidente ang gihimo sa Ombudsman sa kaso sa Captain’s Peak Resort sa Sagbayan, Bohol, siguro aduna siyay makuha nga impormasyon. Ngano man? Matod pa sa usa ka kapitan sa barangay nga naapil sa kiha, susko, mura man mi og gi-shotgun sa Ombudsman.
Tiaw ba nga 263 kabuok ang gikasuhan sa Ombudsman tungod sa pagkatukod sa Captain’s Peak Resort didto sa usa ka bungtod sa Sagbayan nga naapil sa gitawag og chocolate hills, unya apil kini sa gitawag og protected area ubos sa NIPAs act.
Nagsugod ang pagproseso sa mga dokumento kaniadto pang 2003 pero nigawas ang notice of violation sa EMB sa DENR-7 kaniadto lang Marso 25, 2024.
Mao tingali gipasabot sa kapitan nga gi-shotgun sila kay bisan kadtong wala pa ma-kapitan sa 2003, apil na kadtong natangtang na sa serbisyo paggawas sa notice of violation sa Marso 25, 2024, giapil man gihapon sa kiha.
Kon gihimo kini sa Ombudsman sa Captain’s Peak Resort bisan pa kon titulado na ang yuta nga gitukoran, maayo sab tingali nga himuon kini sa tanang mga flood control projects sa tibuok nasod. Kon himuon man gani kini, pila kaha ka libo ang makasohan sa Ombudsman?
Maayo tingali nga tahasan sa presidente ang Ombudsman nga maoy moimbestigar sa flood control projects sa tibuok nasod.
○ ○ ○
Ambot kon naapil ba sa maong kontrobersiya ang gihimo sa usa ka “influencer” kaniadto. Mosuroy siya sa mga mayor aron pag-ila sa mamahimo nga flood control project sa iyang lungsod. Human matino kon asa kini ibutang, ang “influencer” na ang bahala nga mangita sa kuwarta alang sa maong proyekto, apil na ang contractor nga motrabaho niini.
Matod pa, dili ra moreklamo ang mayor kay gawas nga makakuha siya og proyekto nga iyang ipanghambog nga iyang kalampusan, makakuwarta man sab siya. Tungod kay dako man ang “kikik” gikan sa pundo sa maong proyekto, mahuman man tuod ang proyekto pero klaro kaayo nga moryo-moryo lang kini.
Parehas adtong gibanlas nga flood control project og nigawas nga kawayan lang diay imbes kabilya ang gamiton niini. Giunsa kaha kadto pagpasar sa DPWH?