Diputado: Kidnapanay sa mga ABC President

Cuentas Claras
Diputado
Diputado(File Photo)

Bag-o pa lang nahuman ang piniliay alang sa pagka-presidente sa Association of Barangay Councils (ABC) sa tibuok nasod.

Matod pa sa uban nga nakadaog sa maong piniliay nga gisalmotan sa tanang mga Punong Barangay sa lungsod, dako-dako sab ang ilang nagasto tungod kay migasto man sila aron modaog pagka-Punong Barangay. Laing gasto na sab aron mapili nga Presidente sa tanang mga Punong Barangay tungod kay matod pa, dili man sab mobotar ang mga Kapitan kon way inangayan ang magpapili pagka-presidente nilang tanan.

Angay sab nga mogasto sila kay magdawat na man sila sa kantidad nga dawaton sa mga regular nga mga kagawad sa lungsod isip ex-officio nga sakop sa sanggunian, matod pa sa usa ka Kapitan.

Husto sab.

○ ○ ○

Kadtong mga ABC President nga gustong magpapili pagka-presidente sa ABC sa tibuok probinsiya aduna na sab giatubang nga laing kagastohan.

Laktod pagka-sulti, paliton na sab nila ang mga boto sa mga ABC President sa kada lungsod aron makuha nila ang hustong suporta sa mga kauban nilang ABC President.

Maluag-luag lang ang ilang problema sa kwarta kon mosuporta kanila ang Gobernador ug mga Kongresista tu­ngod kay gawas sa kwarta nga iayuda, motabang man sab og kampanya ang maong mga politiko.

Buot ipasabot, dako ang chance nga modaog ang kandidato nga gisuportahan sa gobernador ug mga kongresista.

Luoy ang mahulog nga oposisyon kay walay motabang kaniya nga dakong politiko.

○ ○ ○

Lain-lain ang paagi sa kampanya.

Adunay gitawag og kidnapping with consent diin tapokon ang tanang mga kaalyado nga mga ABC President, dad-on sa usa ka sekretong lugar, hatagan sa tanang kalingawan, pagkaon ug inom, unya hatagan pa gyud og kwarta.

Kon daghan ang pondo, binlan pa gyod og kwarta ang asawa aron mosugot nga kidnapon ang iyang bana ug dad-on sa sekretong lugar.

Makauli lang ang mga gipang-kidnap kon mahuman na ang piniliay ug midaog na ang ilang kandidato.

Ang lugar nga tagoan mahimong anaa ra sa probinsiya ug mahimo sab nga adto sa silingan nga probinsiya.

Ang problema lang kon molabang pa og dagat ang maong lugar kay mahimong maglisod sila pagbalik kon adunay bagyo ug dili tugotan ang mga barko sa dagat nga mobyahe.

Mao kini hinugdan nga ayo­hon gyud ang pagplano nga dili mabulilyaso ang ilang mga gustong mahitabo.

○ ○ ○

Dihay panahon kaniadto nga wala pahibaw-a ang asawa nga “gikidnap” ang iyang bana sa usa ka grupo.

Siyempre, nabalaka ang asawa sa dihang wala mauli sa ilang balay ang iyang bana ug misamot pa gyod sa dihang dili makontak ang iyang cellphone bisan giunsa nila pagtawag ug pag-text.

Tungod niini, pun-an pa sa hulhog sa pikas grupo, mi-report ang asawa sa kapolisan nga gikidnap ang iyang bana ug tuod man, gipangita sa mga police ang gikidnap nga ABC President sa lungsod.

Miresulta kini sa kagubot sa dihang nahibaw-an ang lugar nga gitagoan ug giadto kini sa mga kapolisan, sa pamilya sa gikidnap ug sa mga kauban niya sa politika.

Dili gustong pagawson ang “gikidnap” sa kidnappers maong miresulta kini sa init nga tinubagay sa mga kapolisan ug sa kidnappers.

Naundang lang kini sa dihang miinsister gyud ang asawa nga dad-on niya ang iyang bana ug walay nahimo ang kidnappers.

Labi na kay dihay mga sakop sa local media nga apil sa grupo.

Manghinaot kita nga dili kini mahitabo sa umaabot nga piniliay pagka Federated ABC President sa probinsiya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph