Adunay naandan na nga buhaton ang mga kandidato pagka senador kaniadto - kanunay gyud na kuyog ang presidente sa mga rally. Ngano man? Tungod kay kasagaran mahitabo, ang presidente gitawag og “crowd drawer” nga sama sa magnet nga dugokon gyud dayon sa baga nga hut-ong sa katawhan.
Tuod man, modugok gyud ang mga katawhan kay ang uban mahilig magpakuha og “selfie” o “groupie” sa presidente dayon ibutang dayon sa Facebook. Solb na dayon ang ilang hilig.
Daghan sab ang modugok kon naa ang presidente tungod kay wala ug tuo man dayon ang mga proyekto nga ihatag sa presidente sa maong lugar sanglit kauban man sa presidente ang mga kalihim sa lainlaing departamento sa iyang gabinete.
Ang mga problema sa maong lugar masolbad dayon tungod kay basta naa ang presidente, instant action man dayon ang mahitabo.
Usa lang ka tawag sa presidente, Yes Sir dayon ang tubag.
Mao kini hinungdan nga magkugi sab og anha ang mga lokal nga mga opisyales kay dali ra man matagad ang ilang mga reklamo, gawas pa sa kahigayonan nga maisa ang ilang kamot og sa ilang pagtuo dako kini og ikatabang sa ilang kampanya.
Mao kini hinungdan nga permi kuyog ang presidente sa kampanya sa mga senador kay maayo na lang nga matabangan ang ilang kandidatora ug mogawas sila nga mananaog.
○ ○ ○
Buyno, apil sab nga hinungdan nga daghan ang mga tawo kon anaa ang presidente sa kampanya kay duna pod gitawag og “hakot crowd.”
Kasagaran mahitabo, dunay quota ang mga mayores sa mga tawo nga ilang dad-on sa lugar nga tambongan sa presidente.
Kon dako nga lungsod o siyudad, dako ang quota, unya ubos lang ang quota kon gamay lang ang lungsod.
Apil sa maong hut-ong kadtong mga trabahante sa gobiyerno nga mga casuals o job order lang kay usa ka singka sa mayor, sugot na dayon ang maong mga kawani.
Apil sa maong “hakot crowd” kadtong beneficiaries o gisaaran nga hatagan sa mga ayuda sa kagamhanan sama sa Tupad, AICS ug uban pa.
Kadtong nalista, sigurado gyud nga motambong sa maong kalihukan kay aron sigurado nga madawat ang gisaad nga ayuda.
Gawas kanila, aduna sab mga grupo nga binayran nga suheto na kaayo sa kalihukan sa kampanya.
Nasayod na sila og unsay ilang buhaton ug litukon o isyagit kon tawagon na ang ilang kandidato.
Sila kadtong kinakusogan nga mosinggit, kinamaayohan modapo sa ilang mga kamot ug makita kaayo nga magdungan gyud silang tanan.
Sama sa dunay script nga gisunod, usa lang ka mando sa leader sa grupo mogawas na dayon ang hiniusang action sa grupo.
Kadtong wala masayod sa maong drama, makaingon gyud nga hilabihan ka ilado ang maong kandidato ug daghan na lang usab ang mosabat sa ilang ipanulti.
Labi na gyud kon silang tanan sa grupo magsul-ob sa sinina sa ilang kandidato, gawas pa sa mga tarpaulin nga ilang dad-on.
○ ○ ○
Apan dunay kalainan nga nahitabo karong mga panahona. Dili na kaayo kugihan nga moabiba ang mga katawhan sa mga kampanya bisan pa kon anaa ang presidente.
Diha gani higayon nga nakayawyaw ang usa ka gobernador nga - matay, mingaw man - sa dihang gitawag niya og balik-balik ang pangalan sa presidente pero wala lang gyud maggunok ang katawhan.
Makita sab didto sa maong kalihukan nga nagpunay og warawara sa iyang mga kamot ang presidente pero wala lang magtagad ang katawhan.
Wala gani nahinangop o mokuha man lang sa hulagway bisan pa kon makita nga luag ra kaayo ang mga taga-PSG sa ilang pagbantay sa presidente. Ngano man kini? Unsa may hinungdan nga sama sa nabugnaw na man ang tinagdan sa mga tawo ngadto sa presidente? Unsa may nabuhat o wala mabuhat sa presidente nga maoy nakaingon nga bugnaw og tinagdan ang mga tawo kaniya?
○ ○ ○
Nag-iyahay na karon ang mga senador sa ilang kampanya. Kadtong adunahan nga mga kandidato mailhan dayon pinaagi sa gidaghanon sa mga kuyog sa iyang kampanya, mailhan sab sa ilang mga gigamit nga mga sakyanan, apil na ang ilang gigamit nga mga pribado nga eroplano. Kadtong igu-igo lang ang pundo, magsakay lang sa commercial flights, pipila lang kabuok ang kuyog o kauban ug molikay sa baga nga hut-ong sa katawhan kay hadlok makagasto og dako. Molikay sab sa mga media labi na kadtong mga lugar nga naila na nga adunay “envelopmental journalism o kada interview dunay bayad nga nagtaban. Usa kini sa mga rason nga dinhi sa Pilipinas, kwartahay gyud ang piniliay, kon wala kay kwarta, pahuway na lang.