Diputado: Lisod na og pun-an pa

Cuentas Claras
Diputado: Sobra ra ka-mahal
SunStar Diputado
Published on

Usahay, himuon na lang kataw-anan ang pagtawag og sir o maam sa suod nga mga amigo nga sakop sa LGBT (lesbian, gay, bisexual, and transgender).

Kon tawgon og Sir, moingon sila nga hoy, dili sir kondili maam unya sundan dayon sa katawa. Unya kadtong tawgon og maam, ang uban mo-smile ra pero ang uban moreklamo nga dili lang patawag og maam, bakikawan pa tingali sila.

Unsa man gyod ang husto nga patakaran mahitungod sa angay nga i-address sa mga sakop sa LGBT?

Alang kanako, depende kini sa daghang mga butang.

Una, depende sa kasuod o dili suod. Kon suod na, dili magsapayan kon unsa ang itawag. Pero lahi na kon dili suod o bag-o lang nga kaila.

Tungod niini, mag-depende na sab kini sa “social awareness” sa mosangpit. Adunay mga tawo sa katilingban karon nga midawat na sa mga sakop sa LGBT mao nga sayon na lang kaayo alang kanila nga motawag og miss o maam, unya dili pa gyod bakikaw paminawon.

Pero duna say ubang mga tawo nga wala pa gyod makadawat tungod kay alang kanila duha ra ka klase ang mga tawo karon - lalaki ug babaye - og wala pa masulod sa ilang bokabularyo ang tunga-tunga sa lalaki ug babaye.

Kon mahitabo kini, depende na sab kini sa hitsura o bayhon sa tawo nga anaa sa ilang atubangan. Adunay mga sakop sa LGBT nga bisan asa tan-awon, ma-hayag o ngitngit ba kaha, babaye gyod ang dating. Labi na kon pun-an sa binaye nga tingog unya angay pa gyod og pamarog, dali ra kaayo ang pagtawag og miss o maam. Pero aduna say uban nga bisan unsaon pag-matekmatik, klaro gyod kaayo nga dili babaye, labi na kon palabihan sab ang pintal sa nawong ug nasobraan ra sab ang paglabyog-labyog sa sampot o hapin sa dughan, tomatik na gyod na nga Sir ang mogawas sa baba ug dili Mam.

Kon mahitabo kini, angay ba nga masuko?

Alang kanako, dili kini angay ikasuko. Hinunoa, mao kini ang tukmang panahon nga mogawas ang pagsabot ug pagpasabot sa angay nga ipasabot. Tungod kay matag-usa kanato, aduna may tawhanong katungod sa paghuna-huna ug pagsabot sa mga butang sa katilingban.

Kon katungod sa mga sakop sa LGBT nga mosagop sa hunahuna nga lahi sila sa lalaki ug babaye, katungod sab sa uban kon motuo ba o dili sa gituhoan sa mga sakop sa LGBT. Kon dili sila motuo o mosagop sa gituhoan sa mga taga-LGBT, walay katungod ang mga sakop sa LGBT nga masuko.

Ang angay nila buhaton mao ang pagpasabot sa katilingban nga lahi sila, angay sila respetuhan ug dili pakaulawan.

Susama usab kini sa giingon nga kon gusto ka nga respetuhan, respetohi ang imong mga isig ka-ingon. Kay kon dili ka mo-respeto sa uban, dili usab ka angay respetohan.

Amen.

○ ○ ○

Among gikauban kaniadtong Lunes si VP Inday Sara Duterte tungod kay miduaw siya sa haya ni kanhi Bise Gobernador Victor Balite. Suod nga amigo sa mga Balite ang mga Duterte, apil na ang amahan niini nga si PRRD tungod kay kaniadtong Marso 16, 2015, nahimong bisita ug mamumulong sa graduation sa eskuylahan sa mga Balite si PRRD nga mayor pa sa Davao City niadtong panahuna.

Mao kadto ang sinugdanan sa paglambo sa relasyon sa duha ka mga pamilya ug mao usab kini ang hinungdan nga all-out nga suporta ang gihimo sa mga Balite aron modaug sa Bohol si PRRD, apil na ang iyang sinaligan nga si Senador Bong Go.

Samtang nangampanya ni PRRD padung sa 2016 nga piniliay, kugihan usab kaayo si Inday Sara, apil na ang iyang inahan nga si Elizabeth, nga miapil sa kampanya. Didto sa eskuylahan sa mga Balite sa Tagbilaran nanihapon ang grupo ni Inday Sara, didto mipahuway ug mi-park sa ilang daghan nga mga sakyanan.

Apil sa gihisgutan ni Inday Sara ang iyang mga kasinatian panahon sa kampaniya niadtong panahuna. Hangtod miabot sa topic sa kasamtangan nga pamulitika, ang iyang mga plano, mga tsismis didto sa “taas” ug uban pa.

Pero dili na nato kini iapil sa atong lindog karon. Hinay-hinayon lang nato kini og hubad sa tukmang panahon.

○ ○ ○

Dihay mga politiko nga niabot panahon sa pagbisita ni Inday Sara. Tomatik unta kadto nga maghinangop dayon pahulagway dayon para ibutang sa pisbok. Pero dihay milikay. Nakasabot ra pod dayon si Inday Sara ug siya pa mismo ang misulti sa wala ikasulti sa mga politiko. Bisan pa man sa mga isyo sa nasod, nagpabilin ang respeto ni Inday Sara ngadto kang PBBM, sa iyang igsuon nga si Senador Imee Marcos ug matod pa niya, nagpadayon pa gihapon ang ilang panag-amigo ni PBBM.

Diha na lang kutob kay lisod na og pun-an pa.

Trending

No stories found.

Just in

No stories found.

Branded Content

No stories found.

Videos

No stories found.
SunStar Publishing Inc.
www.sunstar.com.ph