Diputado: Maminaw ta ni Robinhood

Cuentas Claras
Diputado
Diputado(File Photo)

Nagkadaiya lang ang mga hunahuna nga nanggawas karon kabahin sa plano nga pag-usab sa Batakang Balaod, apil na niini ang naglungkaob nga kasikas sa kaulohan nga naglambigit kanila ni Presidente BBM ug kanhi Presidente PRRD , apil na ang iyang mga anak nga lalaki.

Hilabihan kakusog ang sambunot sa mga pulong nga usahay mahadlok na lang kita og unsa kahay sangputanan niining tanan.

Taliwala sa kalandrakas sa hunahuna, nipagawas karong bag-o lang si Senador Robinhood Padilla og usa ka reso­lusyon.

Pinaagi sa usa ka resolusyon, gusto ni Padilla nga kon duna may pag-usab nga pagahimuon, tapukon ang Senado ug ang Ubos Balay-Balauranan aron tukion ang gusto nga mga kausaban pero magbuwag na sa duha ka grupo kon magbotar na.

Misibo usab kini ni kanhi Supreme Court Associate Justice Vicente Mendoza nga misulti nga magtapok sa pagtuki pero magbuwag sa duha ka grupo kon magbotar na.

Uyon ako niini.

○ ○ ○

Una, maklaro na gyod ang proseso sa pag-usab ug dili na kini makahatag og kalibog pa sa katawhan.

Ikaduha, mogawas ang tinuod nga spirito sa bicameralism sa atong kongreso, ang Senado ug ang Ubos Balay-Balauranan.

Ikatulo, kon ang ordinaryo nga balaod moagi sa pagbasa sa duha ka higayon, una sa Ubos Balay-Balauranan usa pa ipasa sa Senado, unsa na kaha ang pag-usab sa Batakang Balaod nga usa ka hilabihan ka importante nga panghitabo-politikal.

Ikaupat, posible nga mahunong na ang kusog nga kasikas ug kaguliyang sa nasod tungod sa gihimo sa grupo nga nagpasiugda sa “pirma” nga matod pa, “palit-pirma.”

○ ○ ○

Nindot usab kining gusto mahitabo ni Kalihim Benhur Abalos sa Department of the Interior ang Local Government (DILG) sa pag-awhag sa mga lokal nga pangagamhanan sa pagseguro nga luwas ang katawhan pinaagi sa pag-implementar sa balaod nga nagdili sa mga tricycle, tri-cab, apil na ang pedicab sa pag-agi o pag-gamit sa national highway.

Ngano man?

Tungod sa nagkadaghan nga panghitabo sa disgrasya sa kadalanan, apil na ang pagdasok sa trapiko sa mga lugar nga gigamit nga agianan sa mga tricycle, tri-cab ug pedicab. Husto kaayo kini, pero kulang.

Angay nga iapil sab nga bantayan sa mga lokal nga pangagamhanan ang gihimo karon sa mga nag-motorsiklo nga wala ug tuo mo-overtake ug bisan asa na lang nila kini himoa.

Iapil usab ang pagpahinumdom sa mga motorista nga kadtong hinay nga nagpadagan (slow-moving vehicles) dili magpatunga kon dili, adto sa daplin sa tuo nga bahin sila mosubay kay dako kining hinungdan sa disgrasya ug kabaga sa trapiko.

Ang uban pa gani nga nagmotorsiko kay masuko kon businahan aron pahibaw-on nga dunay mo-overtake kanila nga sakyanan.

Kining mga butanga dako kaayo nga isyo kon maghisgot na kita og kaluwasan sa katawhan kay malikayan man ang gitawag og “road rage.”

○ ○ ○

Nindot sab nga repasuhon ang planong balaudnon nga magdili sa pagrehistro sa mga sakyanan kon walay garahe ang tag-iya.

Tiaw bay himuon na man nga garahian sa ilang sakyanan ang karsada ug makabalda kaayo kini sa kahapsay sa trapiko. Gawas nga magdasok ang mga sakyanan, usa usab kini sa hinungdan sa disgrasya sa kadalanan.

Pwede ba?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph