Diputado: “Maoy is the key”

Daghang busy karong mga panahona. 

Kadtong mga nidaog sa miaging piniliay busy og atender sa mga meeting para sa ilang umaabot nga oath-taking, sabotan kon unsa ang sequence sa program kinsa ang mo-administer sa ilang oath, pila kabuok ang ilang bisita nga reserbahan na daan og lingkuranan ug uban pa nga mga butang. 

Samtang nag-atubang sila niini, busy sab sila ug ang ilang mga sakop sa pamilya paghunahuna kon unsay ilang isul-ob panahon sa oath-taking, unsay klase sa barong, karsones, ug sapatos nga isul-ob sa mo-hural, unsay panapton, color ug tahi sa isul-ob sa asawa sa mohural, apil na ang isul-ob sa ilang mga anak. 

Dili sayon ang pagpili sa isul-ob kay kasagaran mahitabo ang asawa ang magbuot ug igo ra sa pagsul-ob ang bana, unya napugos lang ang bana sa pagsul-ob aron way gubot. 

Bisan bana ra na sila, pero duna baya pud na silay kaugalingon nga gusto unta nga mahitabo labi na kay sila ang mosul-ob niini. Diha bitaw to kagawad kaniadto nga dugay naglalis sa iyang asawa sa mall kay wala sila magkasinabot sa design ug sa panapton sa barong nga isul-ob sa bana. 

Gusto sa bana kadtong mahalon nga cloth unya dili dali makum-os pero gusto sa asawa nga kadto lang baratuhon total panagsa ra bitaw gamiton. 

Kon wala pa motambag ang tindera, dili gyud tingali to sila mahuman og lalis.

Gawas pa niini, busy sab sila og hunahuna kon kinsa ilang imbitahon sa seremonyas, labi na kon limited lang ang gidaghanon sa imbitahon kay kon dili nila maayuhon og plano, basin mahiubos ang uban nga wala maapil sa lista.

Kadtong daghan og mga kaparyentihan unya naa pay kuwarta nga madawdaw, makahunahuna na lang nga maghimo og linain nga salusalo sa ilang balay para maapil gyud ang tanan nilang mga paryente sa salusalo, apil na ang ilang mga silingan ug mga amigo sa ilang mga silingan. 

Magpunsisok gyud ang mohabhab kay libre na gud nang pakals ana. Ayuhon pud pagpili ang sud-an nga hikayon kay dili baya pwedi nga mag-ihaw lang og nangka, mag-adobo og tangkong o mag-lata lang og mongos nga subakan og bulad kay asuaso gyud dayon ang panaway sa mga mokaon ana kon mao nay mahitabo. 

Lisod baya rong panahona kay moabot dayon sa pisbok ang batikos sa mga nikaon nga wala malipay sa sud-an.

Apil sab sa ilang ka-busy ang pagpili kon kinsa ang ilang huralan kay tagsa-tagsa kanila aduna may katungod nga mopili. 

Lisod sab paminawon kon ang labing taas nga opisyal sa probinsiya mohural lang sa usa ka municipal or RTC judge unya ang labing ubos sa mga provincial kagawad mohural sa usa ka justice sa Court of Appeals or Supreme Court ba kaha. 

Mao kini rason nga sa layo pa ang oath-taking, sabotan na daan ang mga opisyales nga huralan aron maplano og maayo ug dili bakikaw paminawon sa mga nanan-aw sa seremonyas.

Kadtong mga nangapilde busy sab.

Kadtong duna pay kuwarta nga nahibilin, busy og pangita og paagi asa sila mobiyahe o unsay ilang buhaton aron makalikay sa mga kasadya nga gimugna sa mga nidaog kay sakit pa kaayo paminawon ang samad sa kapildihan. 

Kon daghan ang kuwarta, abroad gyud dayon ang rombo pero kon iguigo ra, mangadto na lang sa dagat aron lumsan sa pagkaligo ang ilang gibating kaligutgot. 

Ubanan pud kini og inom sa alak o tuba dala ang ang way tihik-tihik nga maoy.

Kadtong nahurot na ang kuwarta kay gihurot og kopras sa ilang mga kaalyado panahon sa kampanya, busy sab og pangita og paagi asa dapita sila sa ilang balay magmukmok ug magmaoy. Maoy is the key, matod pa.