Sa mga nasuheto sa kinaiya sa usa ka mayor, usa dayon ang ilang ikasulti - bright ug street smart, pasabot dali ra kaayo makat-on.
Bisan mayor siya pero sa mga tawo nga nagkinahanglan sa tabang legal, dali ra kaayo mohatag si Mayor sa iyang tambag, ug kadtong maminaw sa iyang estorya magtuo gyod nga abogado sab si Mayor. Maayo kaayo mohatag og tambag si Mayor ug kadtong makadungog kaniya, magtuo gyod dayon nga husto ang iyang gipanulti.
Sa iyang mga kontra, gitawag siya og “Mr. Know it all” kay dili man gyod siya mawad-an og pagpasabot sa bisan unsang topic o issue nga lisod sabton sa ubang mga tawo.
○ ○ ○
Tungod kaha sa iyang kompyansa nga mora na siya’g abogado (MA), niabot ang panahon nga namatay ang iyang amahan ug adunay mga kabtangan nga gipanag-iya sa iyang amahan kauban sa iyang mga igsuon.
Tungod kay nagkinahanglan siya og dakong kwarta kay padung siya molansad pagka-mayor, gikombinser niya ang iyang inahan nga ibaligya ang usa ka parsela nga yuta nga gipanag-iya common sa iyang amahan ug mga igsuon niini.
Bisan nagduda ang iyang inahan nga dili kini mahimo, pero maayo kaayo mopasabot ang Mayor nga mahimo lagi, kon mosalig lang ang iyang inahan, siya pa ang mohimo sa dokumento niini.
Tuod man, naghimo siya og dokumento ug gipalabas sa Mayor nga ang iyang amahan lang ang bugtong tag-iya sa maong yuta. Nahalin ang maong yuta ug sumala sa plano, nagamit gyod sa Mayor ang kwarta ug midaog siya sa piniliay.
Wala pa gani molabay ang tulo ka tuig, nakurat na lang ang katawhan sa lungsod sa dihang migawas ang taho nga kasohan ang mayor apil ang iyang inahan og kaso kriminal tungod sa ilang pagbaligya sa yuta. Nasayran sab nila nga aduna diay mga igsoon ang amahan sa Mayor ug nasuko sa iyang gihimo ug sa iyang inahan nga gibaligya nila ang yuta nga gipanag-iya sa common.
Gawas sa kaso kriminal, gikasuhan sab sila og civil aron inulo (nullify) ang dokumento sa pagbaligya o deed of sale, ug gipangayoan og dako-dako nga danyos (damages).
○ ○ ○
Mikuha man tuod og abogado ang mayor para modepensa pero ang abogado nga gikuha naglibog kon unsa man gyod ang iyang trabahuon.
Ang mayor ang naghimo sa tubag (Answer), ang mayor ang naghuna-huna sa depensa, apil na ang paghimo sa gitawag og pleadings sa maong kaso. Ang abogado igo lang mopirma sa human na daan nga mga papeles legal nga hinimo sa mayor.
Sa unang higayon, mireklamo ang abogado pero miinsister gyod ang mayor nga siya ang mohimo sa tanang dokumento ug igo lang niya pirmahan kini, total, matod pa sa mayor, “husto bitaw akong bayad nimo, Attorney.”
Kon dunay schedule nga hearing, ang mayor naa gyod molingkod tupad sa abogado bisan kon ang maong lugar gi-reserba alang sa mga abogado.
Tuod man, nakurat ang huwes pagkabasa sa dokumento sa depensa tungod kay kasagaran sa nahimutang pulos “all capital” o all caps, ug abunda sa batikos ug panghimaraot ang nakasulat sa dokumento.
Sa unang higayon, gi-warningan sa huwes ang mayor nga dili magbinastos sa mga dokumento sa korte pero sama sa wala makadungog ang mayor sa gisulti sa huwes ug padayon ang iyang paghimo sa mga dokumento nga all-caps.
Wala na makaagwanta ang huwes, gi-sermonan kini nga ihatag sa iyang abogado ang paghimo sa mga dokumento kay mao kini trabaho sa mga abogado ug kon himoon pa gihapon pag-usab sa mayor ang iyang gihimo, i-contempt niya kini ug prisohon.
Pagka-dungog sa pulong nga prisohon, sama sa nakamata ang mayor ug nangayo og dispensa sa huwes, ingon man sa iyang abogado.
Buyno, bisan pa niini, gihukman ang kampo sa mayor nga as in default ug hangtod karon, padayon ang kaso diin ang pikas kampo mao na ang nagpakita sa ilang mga ebidensiya.
Lisod sabton ang gihimo sa mayor, aduna ba kaha kini husto nga panghuna-huna o aduna lang gyod gamay turnilyo sa utok nga naluag?
