Diputado: Mga bag-ong abogado

Cuentas Claras
Diputado
Diputado(File Photo)

Sigon sa gianunsiyo sa Supreme Court, migawas gyod ang lista sa mga nakapasar sa pasulit pagka-abogado sa petsa nga ilang gisaad.

Daghan ang nakapasar, daghan sab ang wala kapasar.

Siyempre, dili matukib ang kalipay sa nakapasar ug dili sab masukod ang kaguol sa mga wala kapasar.

Apil na niini ang ilang mga ginikanan, mga paryente ug kahigalaan.

○ ○ ○

Sa mga wala makapasar, sakit palandungon nga sama sa nausik lang ang tanan nga gihimo ug gigugol alang sa maong pasulit. Sayang ang dakong kantidad nga gigasto alang sa review ug alang sa pasulit mismo.

Sayang ang mga oras nga gigugol sa pagbasa ug pagtuon sa daghan kaayo nga mga libro ug review materials. Tungod kay nag-review, isakrepisyo na lang ang ubang mga importanteng panghitabo tungod kay nagtuon lagi alang sa maong pasulit. Sayang ang kahago, ang tanang panahon nga gigamit alang sa pagtuon unya mahagbong man lang diay.

Ug sayang ang tanang mga pag-ampo, pagsimba, pagdagkot og kandila ug mass offerings unya wala man diay dungga ang tanan kay nahagbong man lang gihapon.

Tungod sa di matukib nga kaguol, pagmahay ug kasakit, mohilak ug modangoyngoy na lang aron lang mapagawas ang di masabot nga pagbati. Ang uban, dili ganahan mokaon, dili ganahan mogawas sa kwarto, di ganahan makig-storya, di ganahan makigkita sa mga higala ug mga sakop sa pamilya ug magsigi na lang og dangoyngoy sa tumang kaguol.

Ang uban sab, maghubog dayon magyawyaw sa tumang kasakit. Magyawyaw kon nganong si kuan nakapasar man unya siya nahagbong man.

Adunay uban nga dali ra maka-recover. Pipila lang ka adlaw nga kaguol, mahimo na dayon nga mogawas ug mobalik na sab og tuon kay gusto lagi nga ma-abogado.

Kana lagi kon dunay kwarta nga ikasugakod sa ikaduhang review. Kon way kwarta, igo na lang sa pagpangandoy.

○ ○ ○

Sa mga nakapasar, dili matukib ang kalipay nga gibati. Tiaw bay tawgon na siya og attorney ug mahulog na ang titulo nga Mr o Miss sa iyang ngalan.

Daghan ang mopahalipay, daghan ang moatik nga gidungog ang iyang pag-ampo bisan wala baya moampo.

Daghan na ang makaila, tiaw bay gi-publish ang iyang ngalan sa mga national ug local dailies, labi na gyod kadtong kwartahan ang mga ginikanan nga makahimo pag-advertise sa ilang greetings sa pagpasar sa ilang anak, apil na ang pagpatik sa hulagway niini nga malipayon.

Magtawganay dayon ang mga nakapasar ug malipayon nga mag-estoryahanay sa ilang mga kaagi panahon sa review, apil na ang mga kasinatian sa ubang lugar nga bibo ug makalingaw. Tungod kay nakasabot sila sa gibating kaguol sa ilang mga kauban nga nahagbong, kasagaran kanila molikay lang usa og tawag samtang presko pa ang ilang mga kaguol.

Sa tantong estorya, moabot na sila sa punto nga maghisgot na sila sa ilang mga plano isip bag-ong abogado.

○ ○ ○

Sa laktod nga pagka-sulti, medyo hayahay ang uban nga adunay abogado na sa pamilya kay sayon na lang kaayo nga moapil sa opisina sa maong abogado. Dili na maglisod pagpangita sa kliyente kay aduna na may kliyente ang naunang abogado.

Medyo lisod ang kinabuhi sa bag-ong mga abogado nga wala kaayoy kaila nga abogado, labi na kon average lang ang maong abogado. Moagi gyod siya sa tanang pagsulay, labi na kon minyo na siya og duna nay mga anak.

Magproblema ang bag-ong abogado nga nagtrabaho na sa gobiyerno, mopadayon ba siya sa iyang trabaho aron magpadayon ang iyang naandan nga sweldo ug bahala lang usa ang iyang pang-laban o mohawa ba siya aron igugol ang panahon sa pagpanglaban. Kon buhaton niya kini, siyempre dakong problema kini sa panginahanglan sa pamilya ug kasagarang mahitabo, mosupak gyod ang asawa niini, labi na kon gagmay pa ang mga bata.

Natural na lang nga maglisod pa sa pagpangita og kliyente ang bag-ong abogado nga wala pa maiilhi, kon walay kliyente wala poy income. Kon walay income, mag-unsa na man lang ang pagkaon ug ubang panginahanglan sa pamilya?

○ ○ ○

Kalbaryo sa bag-ong abogado ang unang kaso, nga siya na lang nag-inusara sa pagtabang sa iyang kliyente. Tiaw ba nga ibangga ka sa banggiitang mga abogado nga maayo na kaayo mo-ininglis ug mopalusot sa katarungan. Mag-unsa na lang kon mapildi, wala nay moduol pa kaniya, mao kini kasagaran huna-hunaon sa bag-ong abogado.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph