Usa sa mga reklamo sa mga mayor karon mao ang pagdagsa sa mga kalungsoran ug siyudad sa daghang mga badlungon nga mga drayber sa sakyanan, pribado man o pang-publiko, apil kadtong dili mogamit og helmet, dili mopa-rehistro sa ilang sakyanan, dili molukat og driver’s license ug uban pa.
Dugang pa niini kadtong mga depasahero nga mga kolorum nga mo-kompetensiya sab sa adunay prangkisa sa ilang mga sakyanan sa pagpamasahero sa maong mga lungsod.
Taliwala sa mga reklamo gikan sa dunay mga prangkisa, ang kasagaran nga pamakak nga ihatag sa mga mayor mao nga wala silay mahimo niini kay bugtong ang LTO lang ang adunay katungod niini ug mahimo lang nga manakop ang mga kapolisan kon gi-deputize sila sa LTO. Kon walay deputization gikan sa LTO, wala gyod kunoy mahimo ang mga kapulisan, matod pa sa mga mayor.
Husto ba kini?
Dakong sayop og namakak lang ang mga mayor kon mosulti sila niini.
Ngano man?
Adunay mahimo ang mga mayor ug dili tinuod nga bugtong ang LTO lang ang adunay katungod nga mopatuman sa balaod sa trapiko.
Unsa may ilang buhaton?
Mopagawas lang og ordinansa ang lungsod o siyudad mahitungod niini, sama sa gihimo sa usa ka mayor sa Negros Oriental, ug mamahimo na nga kalapasan sa ordinansa ang ipatuman sa mga kapolisan sa maong lungsod. Kon himoon kini, mahimo na nila nga gukdon kadtong walay lisensiya, walay rehistro, dili magsul-ob sa helmet, kadtong mga walay prangkisa ug uban pa.
Dili na sila magkinahanglan pa og deputization order sa LTO aron matuman kini.
Mao kini nahitabo sa maong lungsod sa Negros Oriental. Ang mga kapulisan sa maong lungsod aktibo na sa pagpatuman sa ordinansa sa trapiko ug wala na magkinahanglan pa og suporta gikan sa LTO.
Imbes masuko, nalipay ang taga-LTO tungod kay natabangan man sila sa ilang trabaho ug tungod sa tabang sa mayor, daghan na ang milukat og lisensiya og mipa-rehistro sa ilang mga sakyanan.
○ ○ ○
Laing pamakak sa mga mayor mao ang ilang pagsulti nga wala silay mahimo sa maong mga isyo.
Nganong lain nga pamakak man kini?
Lain nga pamakak na sab kini kay gawas nga mahimo kaayo nila nga gukdon ang mga hinampak nga mga malapason, sa tinuod lang, namolitika lang gyod ang maong mga mayor.
Daghan kanila ang mahadlok nga maapektohan ang ilang mga boto, labi na kon daghan ang mga colorum operators.
Bahala og magbalikbalik ang mga reklamo sa may prangkisa basta maseguro lang nga makuha lang gihapon nila ang boto sa mga malapason, ang mahitabo, kasagaran magpaka-buta-bungol lang ang mga mayor sa maong problema.
Pasagdan lang nila kini hangtod moundang na lang og reklamo ang mga adunay prangkisa.
○ ○ ○
Adunay hitabo sama niini. Dihay gihimo nga paglibot sa tibuok probinsiya ang mga motorcycle riders gikan sa lain-laing mga probinsiya.
Usa ka motorcycle rider gikan sa Mindanao nadisgrasya tungod kay mikalit lang og labang ang usa ka babaye nga nagmotorsiklo sab og miresulta kini sa kamatayon sa maong babaye nga walay helmet atol sa hitabo.
Miulan dayon ang batikos batok sa maong kalihokan sa mga motorcycle riders, kay ngano kuno nga nagdanghag lang og nagpakusog pa gyod sa pagpadagan.
Human sa imbestigasyon, nahibaw-an nga gawas nga walay helmet ang maong babaye nga nakabsan sa kinabuhi, wala sab kini lisensiya ug wala sab ma-rehistro ang iyang gigamit nga motor.
Matod pa, mao kini ang kasagaran nga gihimo sa mga katawhan sa maong lungsod og kay wala lagi mogukod kanila, nawad-an sab sila og kakugi nga mokuha og lisensiya ug mo-parehistro sa ilang mga sakyanan.
Tungod niini, normal ra kaayo nga makita sa maong lungsod ang mga bata o menor de edad nga kusog nga magpadagan sa mga sakyanan, walay helmet og walay sapot sa lawas.
Ngano kaha nga gipasagdan lang sa mayor ang maong mga salawayon nga mga buhat?