Nabatasan na sa kadaghanan nga padung motapos ang tuig, maglumba gyod na og tapok og dose ka klase nga prutas nga lingin, sama sa melon ug uban pa.
Swerte kuno para sa umaabot nga tuig. Bahala og mahal, agwantahon na og palit aron lang matuman ang naandan na nga buhaton. Siyempre, malipay sab ang mga tig-baligya og prutas kay mao ra kini higayon nga kusog kaayo ang palit sa prutas nga lingin hinungdan nga pasakaan sab nila ang presyo sa ilang baligya.
Niining paagiha, malipay ang nagtinda, malipay sab ang mipalit, kay natuman man ang ilang gusto’ng mahitabo.
○ ○ ○
Ang uban sab, adunay ritwal sa ilang pag-simba sa tungang gabii sa Disyembre 31.
Mangita sila og paagi nga ang ilang isul-ob panahon sa misa kadtong sinina nga daghan og mga lingin-lingin, labi na kon pula ang color niini.
Swerte kuno kini ug maoy hinungdan nga maggilak-gilak ang simbahan sa mga tawo nga nagsul-ob og mga sinina nga may polka dots.
Kusog ang palit sa panapton o human-daan na nga mga sinina nga polka dots.
Sama sa nagtapok sa klase-klase nga prutas, malipayon sab ang nanimbahay nga nag-polka dots kay natuman man nila ang ilang naandang buhaton.
Apan wala malipay niini ang kaparian. Ngano man? Kay bugtong ang Ginoo lang ang makahatag sa “swerte” nga gipaabot sa mga tawo, ug dili ang klase-klase nga prutas o polka dots.
Gawas pa niini, kon tinuod man gani kini, daghan na unta kaayo nga mga adunahan sa nasod karon kay kusog man ang pagsunod sa maong mga ritwal sa dugay na nga panahon.
○ ○ ○
Walay problema unta kon kadtong nagsunod sa maong mga pamatasan, gidunganan sab og dugang kakugi o kabuotan sa ilang tagsa-tagsa ka mga trabaho o negosyo kay segurado gyod nga moasenso ang ilang panginabuhi.
Pero kon kutob lang sa pagtuman sa maong ritwal ang ilang gihimo unya gipadayon nila ang ilang pagka-tapolan ug pagka-sugarol sa umaabot nga tuig, lisod palandongon nga mouswag ang ilang panginabuhi.
O kaha, kutob lang sa Pisbok ang ilang pagtuman kay kasagaran mahitabo, maglumba man sab og picture sa ilang natapok nga prutas dayon post sa Pisbok aron makakita ang ilang mga friends nga kompleto ang ilang preparasyon.
Kon ila kining buhaton, nindot unta nga sa talitapos na ang tuig, ila sab picturan ang ilang kinabuhi nga naharuray o nahamugaway na tungod sa ilang pagsunod sa tinuig nga ritwal.
Kasagaran mahitabo kay makalimtan nila kini ug dili nila mapakita sa ilang mga friends nga epektibo gyod diay ang ilang gituhoan nga tinuig nga pamatasan.
○ ○ ○
Susama ra kini sa Santa Claus. Sa gagmay pa ang mga anak, pirming adunay Santa Claus nga mobisita sa ilang mga anak matag-kadlawon nga maoy hinungdan nga pagmata sa mga bata inig ka buntag na, nagbansiwag dayon sa ilang panan-aw ang regalo ni Santa Claus kanila.
Malipay kaayo ang mga bata tungod kay gihatag man ni Santa Claus ang ilang gusto nga regalo labi na kon barato ra. Makaingon ug makatuo gyod ang kabataan nga tinuod ang Santa Claus ug kanunay gidungog ang ilang gipangayo kay naa man dayon inig ka buntag na ang ilang gusto nga regalo.
Mao kini hinungdan nga pirmi maghandom ang kabataan sa pag-abot sa Pasko tungod kay masinati na man sab nila ang kabuotan ni Santa Claus.
Mawagtang lang sa ilang kinabuhi si Santa Claus kon modako na sila ug lahi na sab nga regalo ang ilang pangayoon, gawas pa sa pagahimoon nga exchange gifts atol sa pagsaulog sa Pasko.
Kon atong huna-hunaon, nindot ang maong mga ritwal pero angay sab nga duyogan sa kakugi.