Mura og nahilom na man ang plano nga usbon ang Batakang Balaod. Mingaw pas tirana ang maong plano ug sama sa wala nay gusto pa hisgutan ang maong plano.
Ngano kaha? Unsay nahitabo nga nausab man ang lakat sa panahon?
Labon sa nangaging mga adlaw ug semana, hilabihan ang kasikas sa mga kongresista sa maong plano.
Hilabihan ang ilang yawyaw sa mga senador nga angay paspasan og himo ang maong plano ug aron mapaspas gyod, gikopya sa mga Kongresista sa Ubos Balay-Balauranan ang bersiyon sa Senado.
Pero, abtik ang mga senador. Nganong paspasan man nang planoha na nga naay mas daghan nga angay unahon og tagad, matod pa sa mga senador.
Nipagawas pa bitaw og resulta sa survey ang SWS, hasta ang Pulse Asia, nga naghisgot sa resulta nga mas daghan sa mga Pinoy ang supak sa pag-usab sa Batakang Balaod ug sa resulta nga midahili og maayo ang trust ug performance rating sa dakong opisyales, apil ang resulta nga nag-una sa pagka-presidentiable sila si Tulfo ug Inday Sara, ug namunbon ang House Speaker sa maong survey, kalit lang nahanaw ang plano nga pag-usab.
Mao kaha kadto ang nakausab sa drama politikal? Unsa kahay mahitabo kon gipadayon lang gihapon ang maong plano nga pag-usab sa Batakang Balaod?
○ ○ ○
Daghan ang nagtuo nga mausab ang dagway sa politika sa Negros Oriental sa umaabot nga piniliay sunod tuig.
Daghan ang nagtuo nga molansad pagka gobernador si Kong. Chiquiting Sagarbarria, pagka-kongresista sa Tersero Distrito ang iyang asawa ug kasamtangan nga bise mayor sa Dumaguete City nga si Maisa Sagarbarria ug pagka-mayor sa Dumaguete si Gobernador Chaco Sagarbarria.
Pero sumala sa atong nahibaw-an, padayon lang gihapon si Chaco Sagarbarria sa iyang pagka-gobernador sa piniliay sa 2025.
Kinsa kaha ang iyang kaatbang sa pagka-gobernador? Unsay posisyon nga lansaran sa iyang amahan nga si Kong. Chiquiting ug sa iyang inahan nga si Maisa?
○ ○ ○
Nganong dili man maundang ang problema sa drugas dinhi sa atong nasod?
Dili na lang nako daghanon og yawit pero angay nato hinumdoman nga bisan gani sa Estados Unidos ug uban pa nga mga nag-unang nasod sa kalibotan, nagproblema man gihapon sa drugas.
Mao kini ginaingon nga mentras aduna pay mogamit, magpadayon gyod ang negosyo sa ginadiling drugas.
Kon moabot na tingali ang panahon nga maka-hilo o maka-matay na ang ginadiling drugas ug moderetso na lang og kirig-patay ang mogamit niini, mao na tingali kini ang panahon nga maundang na ang maong bisyo.
Pero kon padayon pa kini nga makalingaw sa mogamit ug maka-dato sa mga nagnegosyo niini, padayon ang akong pagtuo nga lisod gyod kini sumpuon.