Sumpayan nato ang atong gihisgutan sa miaging semana kabahin sa anomaliya sa gitawag og flood control projects nga gigahinan og pipila ka bilyon ka pesos nga pundo pero sama sa bula nga nawagtang lang unya padayon lang gihapon ang baha.
Ang rason - gikopras o gikurakot lang sa mga buaya ang binilyon nga pundo alang sa flood control projects. Mismo ang presidente “nakaamgo” niini panahon sa iyang SONA ug gipangutana niya ang mga buaya kon naulaw ba sila.
Hangtod karon, wala pa mahibaw-i kon nitubag na ba ang mga buaya nga naminaw kaniya. Basta nga wala na maghuwat ang mga katawhan nga tubagon pa kini.
○ ○ ○
Matod pa ni Senador Ping Lacson, nahibaw-an niya nga adunay matod pa sobra sa 67 ka mga kongresista sa 2022 nga nagnegosyo sab o nag-moonlight sab nga mga contractor sa mga proyekto sa ilang distrito aron kuno “makaminos sa gasto.”
Dili na kini balita tungod kay dugay na nasayod ang mga katawhan niini. Nasayod na sila nga ang ilang mga kongresista nagnegosyo sab nga mga contractor sa ilang mga infra projects. Nagnegosyo sab og quarry materials, nagnegosyo sab og mga heavy equipment, nagnegosyo sab og hauling, nagnegosyo sab og gama og aspalto, semento ug uban pa.
Ang resulta - sama sa gi-embodo og padulong tanan sa bulsa sa kongresista ang dakong pahat sa pundo sa lainlaing mga infra projects sa distrito ug gamay na lang nga pundo ang mahibilin alang sa proyekto mismo.
Ang resulta - mokalit lang og kadato ang kongresista ug mokalit sab og kahamugaway ang iyang panginabuhi, apil na ang iyang pamilya.
Pero dunay kulang ang nahibaw-an ni Lacson. Dili kay mga kongresista lang ang nag-moonlight nga mga contractor, hasta pud mga mayor ug mga gobernador.
○ ○ ○
Parehas sa nahitabo sa duha ka managkumpare nga mga mayor. Aduna silay managsama nga mga kaso sa pangurakot kay sila ra sab, pinaagi sa ilang kaugalingon nga mga construction companies, ang nitrabaho sa mga infra projects sa ilang lungsod. Ang nakaanindot pa gyud sa usa nga mayor, gigamit pa gyud niya ang iyang ngalan mismo sa kompaniya nga nitrabaho sa maong infra project, sama sa wala gyud bisan gamay na lang nga kahadlok nga gamiton kini sa iyang mga kontra sa politika.
Dugang nga kaanindot sa duha ka managkumpare nga mayor, magpahulagway pa gyud silang duha atubangan sa ilang nindot ug mahalon kaayo nga mga sakyanan nga sama sa nag-twinning silang duha unya ibutang pa gyud kini sa pisbok.
Klaro kaayo nga hagit sa mga kontra. Tuod man, gikasohan gyud silang duha sa pangurakot ug sa pagkakaron, wala pa mahibaw-i og unsay moresulta sa maong kaso - mahinog ba kini o matulog lang?
Ang punto dinhi - isog kaayo kining duha ka mga mayor nga mopakita sa ilang kadato tungod sa ilang pag-moonlight nga mga contractor sa mga infra projects sa ilang tagsa-tagsa ka lungsod. Ngano kaha noh, dunay gisaligan?
○ ○ ○
Sa unang panahon, kon dunay magtagawtaw bahin sa pangurakot, hagiton dayon kini nga pakasohan, dili lang kay magyawyaw lang. Ang buot ipasabot, kon dunay ebidensiya, gamita ang maong ebidensiya sa kaso ug dili kay mangdaot lang.
Pero karon, bisan gikasohan na, wala pa gihapoy kasegurohan kon unsay dangatan sa kaso - molihok ba kini o matulog lang. Ngano kaha?