Nindot ang plano ni Senator Bong Revilla nga ipaubos ang pagatawgon og senior citizen gikan sa 60 ang edad og himuon na lang nga 56.
Kon moabot na sa edad nga 56, mahimo nang tawgon og senior citizen ug mahimo na nga mo-enjoy og 10% nga diskwento, samtang padayon gihapon ang 20% nga diskwento sa nag-edad og 60 pataas.
Kon imong kwentahon, igo lang gius-os og 4 ka tuig ang edad sa mga tawo nga maka-enjoy sa diskwento, pero dako na kaayo kini og epekto.
○ ○ ○
Matod pa ni Revilla, nakahuna-huna siya pagduso sa maong planong balaudnon tungod sa resulta sa mga pagtuon nga 72 to 74 ka tuig na ang gitas-on sa kinabuhi sa kasagaran nga mga Pinoy.
Sama sa bonus na ang kinabuhi kon molapas pa sa maong edad unya himsog ug lig-on pa gihapon ang panglawas.
Dugang pa niya nga kon mosud na sa edad nga 40, magsugod na ang Pinoy og palit sa mga “maintenance” nga tabletas ug susama nga mga panginahanglan.
Dako na kaayo’ng tabang matod pa niya kon kadtong mag-edad og 56 magsugod na og apil sa mga diskwento labi na gyod sa ilang mga tambal.
○ ○ ○
Taas og kinabuhi ang mga tawo sa unang panahon kon ikompara sa kabag-uhan.
Ngano man?
Una, simple lang ang ilang mga pagkaon ug mga panginahanglan sa unang panahon. Moinom lang og espeso kaayo nga sikwate sa buntag, payts na ang ilang pamahaw, dayon diretso na sa ilang inadlaw nga trabaho. Abtik ug sayo sila motrabaho sa buntag kay sayo man sab sila matulog magabii.
Utan ug prutas ang kasagaran nga kan-on, panagsa lang kaayo makakaon og karne.
Ang utanon nga ilang gikaon gikan sa ilang nataran ug dili pinalit maong limpyo ug luwas nga kan-on, dili parehas karon nga busog ug abunda sa mga chemical ang mga pagkaon.
Ikaduha, simple lang ug dili komplikado ang ilang panginabuhi sa una. Susama sa ilang panginahanglan, mokaon, motrabaho, matulog, mopa-eskuyla ug wala na sa ilang hunahuna ang ubang mga butang nga wala kinahanglana.
Sa unang panahon, nakaila ug nagpuyo sila sa kinabuhing puno sa respeto ug kakugi, diin ang pagpatulo sa singot maoy sumbanan sa kakugi. Sa ilang panahon, wala sila makaila og shortcut sa ilang panginabuhi o instant nga mga pagkaon.
Regular ang ilang ehersisyo pinaagi sa pagbaklay o pagbaktas padung sa trabaho, dili parehas karon nga daghang oras ang gigahin sa kanunay nga paglingkod o pagpuyo sa usa ka lugar.
Bisan tuod og kadaghanan kanila nagsalig lang sa tambal nga binisaya o kanang panambal nga “tutho,” taas ang ilang panginabuhi kon ikompara karon nga naglumbay lang ang mga tambal, clinic, hospital ug mga doctor.
○ ○ ○
Tungod kay mubo na man ang pangedaron sa mga Pinoy karon, angay ug husto ra pod nga hatagan usab sila og kahigayunan nga makatilaw og ayuda gikan sa gobiyerno tungod sa ilang paningkamot nga motaas pa ang ilang pangedaron.
Ang ako lang, manghinaot ko nga makakita og hustong pundo ang kagamhanan para magamit sa maong ayuda. Pero una sa tanan, manghinaot ako nga molusot ang maong planong balaudnon ni Senator Revilla.
○ ○ ○
Kabahin adtong subo nga kamatayon sa usa ka bag-ong na-abogada nga batan-ong babaye nga naapil sa namatay atol sa engkwentro tali sa kapulisan ug mga NPA sa Bohol, husto ba kaha ang mga komentaryo sa katawhan nga na”brainwashed” kuno ang maong abogada sa walhong grupo maong miapil siya?
Kon nakombinsir ang buot ipasabot sa na-brainwashed, walay pagduha-duha nga husto kini. Pero kon ang buot ipasabot sa na-brainwashed kay napugos o gipugos lang maong miapil sa walhon nga grupo, dili ako mouyon niini.
Ngano man?
Husto sa panghuna-huna ang maong babaye tungod kay didto kini nihuman sa iyang pre-Law sa UP Cebu. Lisod tunlon ang estorya nga sa kalantip sa iyang panghunahuna, ingon ana ra siya ka dali kombinsihon pag-apil sa walhong grupo.
Tiaw bay biyaan nimo ang kinabuhing hayahay ug pulihan sa kinabuhi nga hilabihan ka lisod – lisod pagkaon, lisod katulganan o pahuwayan, lisod nga panginabuhi, walay cellphone, Facebook, Netflix o You Tube, dili mahamuyo kay kanunay nagbantay sa ilang palibot ug labaw sa tanan, lisod ang kinabuhi nga kanunay gigukod sa kapulisan ug armadong kusog sa nasod.
Nganong miapil man siya – sa akong pagtuo, miapil siya kay mao kadto ang iyang gusto, mao kadto nga klase sa kinabuhi ang iyang gustong puy-an.