Kon paminawon, ug buhaton, pa lang unta sa bag-ong mga opisyal ang sermon sa mga kaparian panahon sa kasaulogan sa misa sa wa pa sila mohural sa ilang bag-ong mga katungdanan sa nasod, hapsay ug malambuon unta ang atong nasod karon.
Pero ang kasagaran mahitabo, igo lang sila maminaw sa sermon. Lusot lang dayon sa pikas dunggan ang ilang nadungog nga wali ni Pader.
○ ○ ○
Nagkadaiya lang ang ilang mga komentaryo. Nindota sa homily ni Pader ganina noh? Natandog gyud ko sa gisulti ni Pader ganiha sa misa. Ang uban, kebs lang, pitokpitok lang ang mga mata samtang naminaw, sama sa nag-concentrate gyud og maayo. Pagkahuman sa misa, picture-picture dayon, abot na sa dunggan ang tingsi kay nahuman na gyud ang pagsermon ni Pader nga nilapas og 45 ka mga minutos, puol na kaayo paminawon, matod pa.
Pero kutob lang didto. Paggawas sa simbahan, nakalimtan na nila ang ilang nadungog nga mga “pahimangno” ni Pader.
○ ○ ○
Nindot kaayo sila tan-awon samtang nagtingsi sa ilang group picture. Kon tan-awon og maayo, mura sila og suod kaayo, kanang hilabihan ka suod gyud nga way makatupong.
Tam-is na kaayo tan-awon ang ilang mga pahiyom, sama sa way bisan gamay nga kapait nga gibati sa usag-usa. Pero panahon sa kampanya hangtod sa adlaw sa piniliay, isig plano sila kon unsaon pagdaog, bahala na kon unsay mahitabo o dangatan sa ilang kauban sa linya. Isig diskartehay lang basta modaog lang. Dunay nagbirok sa mga lugar nga matawag nga iyang balwarte, buot ipasabot siya lang ang botaran ug dili na iapil pa ang iyang mga kauban sa linya total kon hunahunaon, bisag kauban sila sa linya pero sa tinuoray lang, kontra sila kay parehas ra man sila og gidaganan nga posisyon. Dunggabay usa panahon sa kampanya pero murag amigo na sab kon modaog na, labi na kon mag-group picture na panahon sa oath-taking.
○ ○ ○
Bongga kaayo ang ilang mga porma panahon sa oath-taking. Kagalang-galang gyud ang dating. Kasagaran kanila, nagpalit og bag-o nga mga gamit o suot, kasagaran kanang mga mahalon. Dunay angayan tan-awon, duna pod uban nga kataw-anan tan-awon sa ilang gisul-ob. Dunay mga opisyal nga ordinaryo ra kaayo tan-awon ang ilang gisul-ob pero hilabihan ka bongga ang gisul-ob sa ilang mga asawa nga morag ang asawa na ang mo-hural og dili ang bana. Duna pod uban nga bongga gyud ang tanan, ang bana, ang asawa hasta ang mga anak.
Makita nga gipangadaman gyud og maayo ang okasyon. Pero panahon sa paghural, magsusapinday og magkatumbatumba ang dila sa paglitok sa oath of office hilabi na kay iningles kini. Makita nga ang pinaka-importante nga parte sa okasyon nga mao ang paglitok sa oath of office wala gyod maapil sa dugay nga preparasyon.
Makaluluoy kaayo hilabi na kay dunay ubang mga tawo sa audience nga di gyud makapugong sa ilang hinay nga bahakhak. Pananglit, imbes molitok og “faithfully” nahimo na man hinuon nga “unfaithfully.”
○ ○ ○
Unsay tinuod nga kahulogan sa oath-taking? Himoun kini atubangan sa mga katawhan aron makita ug madungog sa mga katawhan mismo ang ilang saad nga motuman sila sa mga balaod, ug moserbisyo sa mga katawhan sa minatarong og patas nga paagi. Pangutana?
Nganong gipili o limitado ra man ang pasudlon sa lugar nga adto pagahimoa ang okasyon ug nganong dili man open to the public? Nganong magbutang man sila og pahimangno kon unsa ra ang angay isul-ob alang sa maong okasyon, nagpasabot ba kini nga kadtong dili motuman sa pahimangno dili angay pasudlon?