Matod pa sa uban, apil ang usa ka Obispo nga kon way gitagoan, nganong mahadlok man og ipadayon ang impeachment trial?
Ang gusto tingali ipasabot nga kon dunay impeachment trial, magkahibaw-anay gyud kon unsay tinuod kay iyagyag man ang tanang ebidensiya didto apil na ang mga testigos.
Nindot paminawon kining maong pasundayag sa pulong kon husto pa unta kini.
Makita man gud dinhi nga gipareha sa usa ka legal trial ang impeachment trial. Dili ra ba sila parehas.
Sa legal trial, adunay higayon ang nagkiha ug ang gikiha nga mopasundayag sa ilang ebidensiya, apil na ang testigos niini.
Isig pabug-atay sa ebidensiya lang, kon bug-at ang ebidensiya sa nagkiha, mo-daog siya pero kon mas bug-at ang ebidensiya sa gikiha, malibre siya sa kaso ug hukman nga way sala.
Ang Huwes nga mohukom sa kaso gihulagway nga sama sa Goddess of Justice, adunay gigunitan nga timbangan sa pikas kamot, espada sa pikas kamot ug gitaptapan ang iyang mga mata kay igo ra siya maminaw sa ebidensiya nga dili gamiton ang iyang mga mata.
Lahi sa impeachment trial.
Usa kini ka kalihukan sa mga politiko, ang tumoy pamolitika ug ang basihan sa pagdaog o pagkapilde mao ang gidaghanon sa kaalyado sa politika.
Kon daghan ug kaalyado, sigurado na daan ang kadaugan, kon gamay ra, sigurado ang kapildihan.
Sa impeachment trial, dili basihan ang ebidensiya kon dili ang gidaghanon sa kaalyado.
○ ○ ○
Tungod kay naanad na man o kaha nasayod na man daan, ang mga politiko nga sa pamolitika anaa man gyud ang hiphip, inangayan o plete, daghan ang nagtuo nga walay kalainan ang impeachment trial.
Adunay mga politiko nga nagtuo nga sa miaging impeachment trial nga gihimo sa senado, dihay bayranay nga nahitabo aron lang makuha ang gikinahanglan nga 2/3 nga boto sa kinatibuk-an nga gidaghanon sa mga senador.
Pagtuo lang kini sa kadaghanan ug dili mapamatud-an tungod kay kinsa man pud ang moangkon nga nakadawat ug kinsa man sad ang boang nga moingon nga wala siya makadawat samtang ang uban nakadawat.
Matod pa, secret lang ug atu-ato lang lang ni brad.
○ ○ ○
Tungod niini, dili tinuod ug dakong bakak ang pagtuo sa uban nga kon dunay impeachment trial, mahibaw-an gyud ang kamatuoran.
Ang kadaugan o kapildihan sa akusado sa impeachment trial magsalig lang sa gidaghanon sa iyang kaalyado ug walay kalabutan kini sa gibug-aton sa ebidensiya.
○ ○ ○
Pero dunay bug-at nga legal issue nga angay masabtan.
Ang termino sa 12 ka mga senador kutob lang sa Hunyo 30 karong tuiga.
Untop ala una sa hapon sa Hunyo 30, mapapas na ang ilang pangalan sa lista sa senado ug magsugod na sab og trabaho ang mga 12 ka senador nga nidaog sa piniliay sa Mayo 12, 2025.
Sanglit bag-o na man ang senado, magpadayon ba ang ilang katungod nga motuki sa impeachment trial o kinahanglan nga bag-ohon na sab kini?
Kon magpadayon, unsa man ang balaod nga gibasihan niini? Angay nato hinumdoman nga bisan ang gitawag og mga “constitutional experts” adunay magkalahi nga mga opinyon. Dunay niingon nga magpadayon ang katungod sa senado, duna sab niingon nga naputol na ang katungod sa senado pag-abot sa Hunyo 30.
Tungod niini, bugtong Korte Suprema lang ang gihatagan og katungod sa paghuykom niini.
Kon motungtong gyud sa Korte Suprema ang maong isyu, unsa gyud kaha ang ilang ipakanaog nga hukom bahin niini?